La Polizia chantunala dal Grischun ha registrà l'onn 2021 totalmain 2329 accidents da traffic sin las vias grischunas. 15 persunas èn mortas en quests accidents. 600 persunas èn vegnidas blessadas. En cumparegliaziun cun l'onn precedent correspunda quai ad in augment da 20 %. Quai resorta da la statistica actuala d'accidents da l'Uffizi federal da vias (UVIAS).
L'onn 2021 ha la polizia registrà totalmain 2329 accidents da traffic en il chantun Grischun. Quest dumber è levamain pli aut che la media dals onns 2017 fin 2021 e dastga tuttina vegnir considerà sco positiv, sch'ins resguarda ch'il dumber da vehichels en il chantun Grischun è creschì er l'onn passà per circa 2200 vehichels a motor. "Medemamain èsi da considerar – en connex cun l'augment – che l'onn 2020 è vegnida cuntanschida ina valur minimala istorica dal dumber d'accidents da traffic, pervia da la diminuziun dal traffic en consequenza dal coronavirus", agiunscha il schef da la Polizia da traffic, maior Robert Willi.
Dapli accidents cun donns da persunas e cun donns materials
Ils accidents cun donns da persunas èn s'augmentads per 13,8 % e quels cun donns materials per 22,3 %. En cumparegliaziun cun l'onn precedent han trais persunas dapli pers lur vita en il traffic sin via. En cumparegliaziun cun ils ultims 5 onns sa mussa puspè in augment considerabel dal dumber d'accidents da traffic che manischunzas e manischunzs da vehichels han chaschunà sut l'influenza d'alcohol. Sin las autostradas e sin las autovias sto vegnir registrà in augment da 41 accidents (+32 %).
Dapli accidents mortals cun motos e dumber d'accidents constant tar ils velos
Il dumber d'accidents cun motos è s'augmentà cleramain en cumparegliaziun cun il nivel da l'onn precedent. Pauc allegraivel è il fatg ch'il dumber da persunas disgraziadas mortalmain (+1) è s'augmentà ed er ch'il dumber da persunas grevamain blessadas (+9) è creschì. Ils accidents cun velos senza assistenza dal pedal na mussan nagina midada essenziala. Er il dumber dals donns da persunas en connex cun accidents da velo è restà tut en tut praticamain senza midadas. Percunter è s'augmentà il dumber d'accidents cun e-bikes, nua ch'ina manischunza dad e-bike è morta a chaschun d'ina collisiun cun ina moto. Ils accidents da peduns e las persunas blessadas en tals accidents mussan in augment, ed igl ha stuì vegnir registrà in accident mortal.
Sveltezza memia gronda e distracziun sco ristgas
310 accidents da traffic èn capitads pervia d'ina sveltezza memia gronda. La sveltezza maximala legala n'è dentant betg vegnida surpassada en scadin cas, mabain cumpigliads èn er accidents, tar ils quals la sveltezza n'è betg vegnida adattada a las cundiziuns sin via u a las relaziuns da visibilitad. En vista a l'augment da 67,5 % s'impona in'activitad da controlla pli intensiva en quest sectur. In fatg è quel che las distracziuns èn anc adina – tar quasi ina duplicaziun dals accidents durant l'onn da gestiun – anc adina fitg derasadas en il traffic sin via e ch'ellas èn ina gronda ristga.
La statistica detagliada dals accidents da traffic dal chantun Grischun po vegnir consultada en l'internet sut www.kapo.gr.ch/service/statistik.
