Tar la Polizia da traffic da la Polizia chantunala dal Grischun datti ina midada en la direcziun. Per il 1. da fanadur 2022 daventa Aluis Candinas il nov schef da la Polizia da traffic. El remplazza Robert Willi che va anticipadamain en pensiun.

Aluis Candinas, Master of Law ed advocat, da 37 onns, mida da la Procura publica dal Grischun tar la Polizia chantunala dal Grischun. Il Grischun ha studegià giurisprudenza a l'Universitad da Lucerna ed ha lavurà tranter auter sco spezialist tar l'Uffizi per il register da commerzi e per ils notariats dal chantun Son Gagl. Sco procuratur public ha el manà durant ils ultims 6 onns numerusas proceduras en chaussas da la Polizia da traffic e da la Polizia criminala ed ha collavurà uschia stretgamain cun la Polizia chantunala dal Grischun. Ils 4 da matg ha el prestà sia empermischun, quai cun dar il maun a cumandant Walter Schlegel sur la bandiera dal corp, ed è vegnì acceptà en il corp da la Polizia chantunala dal Grischun en il grad d'in maior.

Sco schef da la Polizia da traffic vegn Candinas a manar a partir dal 1. da fanadur 2022 var 45 collavuraturas e collavuraturs. El ha la responsabladad per dumondas dal dretg da traffic ed è en spezial cumpetent per ils centers da controlla per il traffic pesant, per la tecnica da traffic, per l'administraziun da traffic e per la registratura dal traffic. Candinas è commember dal stab directiv da la polizia ed uschia commember da la direcziun operativa suprema.

Midada senza interrupziun
Aluis Candinas remplazza Robert Willi ch'è arrivà avant 25 onns sco schef dal persunal/da l'instrucziun tar la Polizia chantunala dal Grischun. 8 onns pli tard è el daventà schef da la Polizia da regiuns e da traffic da quella giada ed ha ademplì durant tut en tut 14 onns l'uffizi da substitut dal cumandant. L'onn 2010 è Willi stà per 1 onn cumandant ad interim. Dal 2012 fin il 2019 è Willi stà il schef dal stab ed ha lura midà en la funcziun dal schef da la Polizia da traffic.