A partir dal glindesdi, ils 15 d'avust 2022, èsi puspè uschè lunsch. En bleras parts dal Grischun cumenza in nov onn da scola. Millis d'uffants fan per l'emprima giada la via da scola u da scolina. La Polizia chantunala dal Grischun vegn a rinforzar sia preschientscha en la vischinanza da las scolinas e da las chasas da scola.

Uffants èn emprendists en il traffic. Els n'enconuschan anc betg ils privels, na san anc betg valitar endretg las sveltezzas e las distanzas ed er betg s'imaginar il traject ch'in auto dovra per sa fermar. Na reduci betg mo Vossa sveltezza, mabain fermai adina dal tuttafatg Voss vehichel, cura ch'in uffant vul traversar la via. Da la polizia emprendan ils uffants numnadamain da traversar la via pir, cura che las rodas na sa movan betg pli. La Polizia chantunala dal Grischun sustegna la campagna per la via da scola "Sa fermar per uffants da scola". Questa campagna vegn realisada da l'Associaziun Traffic ed Ambient (ATA) e dal post da cussegliaziun da la Mobilitad da peduns Svizra e finanziada tras il Fond per la segirezza stradala (FSS).

Cun quatter tips daventa la via da scola pli segira per ils uffants:

• Charrai plaun e cun previsiun, sch'ins sto quintar cun uffants en il spazi stradal.
• Fermai dal tuttafatg Voss vehichel, sch'in uffant, che ha la precedenza, vul traversar la via.
• Desisti da far in segn cun il maun, per che l'uffant possia sa concentrar sin l'ulteriur traffic.
• Dai a l'uffant il temp ch'el dovra e restai fermà, fin che l'uffant ha traversà la via.

Dapli preschientscha da la polizia al cumenzament da la scola
Per segirar las vias da scola e per proteger las pli giuvnas participantas ed ils pli giuvens participants dal traffic, vegn la Polizia chantunala dal Grischun a far dapli controllas da la sveltezza e da las vias da scola en las vischnancas. Parallelamain visitan ils instructurs da traffic da la Polizia chantunala dal Grischun tut las scolinas en il chantun e mussan als uffants, co ch'els ston sa cuntegnair per traversar la via.