A chaschun d'ina conferenza da medias a Cuira ha la Polizia chantunala dal Grischun preschentà glindesdi avantmezdi la Statistica criminala da la polizia 2023. Il dumber da cuntravenziuns cunter il Cudesch penal è s'augmentà per 23 % cumpareglià cun l'onn avant. Quest augment è d'attribuir cunzunt al dumber creschent da delicts da facultad e da delicts da la criminalitad digitala. Da valitar en moda positiva è la leva reducziun da 13 % tar ils delicts sexuals sco er tar ils malfatgs en connex cun violenza a chasa.

En il chantun Grischun èn vegnids registrads 13 280 delicts l'onn passà. Quai èn 2046 resp. var 15 % dapli che l'onn 2022. La gronda part èn malfatgs cunter il Cudesch penal, numnadamain 10 528 (onn avant: 8531). Da l'augment dal dumber da delicts è pertutgà principalmain il territori da la citad da Cuira, nua ch'i èn vegnids commess 45 % dals delicts cunter il Cudesch penal. 48 % dals delicts èn vegnids commess da burgaisas e burgais svizzers e 26 % da persunas che han ina permissiun da dimora u da domicil en Svizra.

30 % dapli malfatgs cunter la facultad
66 % da tut las cuntravenziuns cunter il Cudesch penal concernan malfatgs cunter la facultad. Il dumber da delicts da facultad è s'augmentà l'onn 2023 per 30 %, numnadamain da 5289 sin 6867. La gronda part dals malfatgs da facultad èn enguladitschs, numnadamain 2772 cas (onn avant: 2354). Dar en egl dat cunzunt l'augment da 59 % tar ils enguladitschs en ina butia e da 55 % tar ils enguladitschs da vehichels. Vegnids engulads èn praticamain mo e-bikes (44 %) e velos (53 %). Er ils delicts d'engion s'augmentan (+86 %). Quai che dat en egl qua è, che pli che trais quarts da quests cas han in connex digital.

Stagnaziun tar il dumber da delicts da drogas – il cocain sa derasa
En il sectur da las cuntravenziuns cunter la Lescha da narcotics sa movan las cifras dapi plirs onns pli u main sin il medem nivel, quai cun pitschnas divergenzas. Quai vala tant per il consum sco er per il commerzi. Dals totalmain 1185 malfatgs èn 461 vegnids commess a Cuira, 327 en Engiadina e 284 en la regiun Rain-Moesa. Consumads vegnan ultra da maschaidas principalmain products da chonv. En il sectur dal commerzi percunter sa derasa il cocain (37 %). Quest svilup è d'attribuir tranter auter a la gronda disponibladad ed als pretschs bass da cocain e po vegnir observà tant sin plaun internaziunal sco er naziunal.

Nagins delicts da mazzament e reducziun da 13 % tar ils malfatgs da violenza a chasa
Cun 702 èn ils delicts da violenza dapi onns, cun excepziun da 2021 (corona), sin in nivel constant. Tar ils delicts da violenza greva hai dà ina reducziun da 45 sin 43 cas cumpareglià cun l'onn avant. En 26 cas sa tracti da blessuras corporalas grevas ed en 16 cas da violaziuns. 88,4 % dals delicts da violenza applitgada greva han pudì vegnir sclerids (onn avant: 91,1 %). In fatg allegraivel è ch'i n'ha dà nagin delict da mazzament accumplì u empruvà l'onn 2023.

En connex cun violenza a chasa èn vegnids registrads 246 delicts penals l'onn 2023. Quai è ina reducziun da 13 %. Ils causals penals ils pli frequents èn smanatschas (59), metter maun vi d'ina persuna (57) e blessuras corporalas levas (36). La mesadad da tut ils cas da violenza a chasa pertutgan relaziuns da partenadi.

Ferm augment da las cifras en il sectur da la criminalitad digitala
Cumpareglià cun l'onn 2022 è il dumber da delicts en il sectur da la criminalitad digitala s'augmentà per 121 % a 1139 (onn avant: 516) cas registrads. Pli che 90 % dals delicts pertutgan la cybercriminalitad economica, 7 % cyberdelicts sexuals ed 1 % cyberdisfamaziuns e cumportaments illoials. 55 % da tut ils delicts da criminalitad digitala èn cyberengions. A la testa stattan ils engions sin plattafurmas d'inserats pitschens.

La statistica detagliada da la criminalitad dal chantun Grischun po vegnir consultada en l'internet sut www.kapo.gr.ch/servetschs/statistica.