Onn per onn carmala la stagiun chauda motociclistas e motociclists sin las vias. La Polizia chantunala dal Grischun porscha sustegn, per che quest temp na prendia betg ina fin andetga. Segirezza dal traffic signifitga er pensar sco partenaris.

L'onn 2023 è il dumber dals accidents cun motos sa reducì da 189 sin 165 en cumparegliaziun cun l'onn precedent. Quest trend sa mussa er tar las motociclistas ed ils motociclists blessads grevamain e mortalmain a chaschun da quests accidents. Ina sveltezza betg adattada u betg avunda distanza èn savens la raschun per tals accidents. Vitiers vegnan collisiuns, chaschunadas perquai che motociclistas e motociclists èn vegnids survesids. La Polizia chantunala dal Grischun dat gronda paisa a la prevenziun per impedir accidents da moto.

Prevenziun
La campagna da prevenziun, lantschada l'onn 2023 cun novs placats en lingua tudestga, rumantscha e taliana, vegn cuntinuada. Per render attent als privels en connex cun l'ir cun moto vegnan montads ils placats da prevenziun per lung da las vias principalas en il Grischun, quai en collavuraziun cun l'Uffizi da construcziun bassa dal Grischun. Er l'onn 2024 accumpogna la Polizia chantunala dal Grischun curs d'ir cun moto che vegnan realisads d'in center per la segirezza stradala. Quests curs èn anc adina fitg appreziads.

Trair a niz per la segirezza quai ch'è sa cumprovà

• In cumportament colleghial, prospectiv e defensiv sa paja. Uschia – e quai na vala sa chapescha betg mo per motociclistas e motociclists – sa laschan evitar accidents da traffic.
• Mantegnair en in stadi irreproschabel la tecnica da la moto – pneus, frains, glisch e.u.v. Er la fitness corporala e mentala da las manischunzas e dals manischunzs è elementara.
• Igl è obligatoric da charrar cun glisch sbassada u cun glisch da circulaziun. Quai – sco er vestgadira clera u che dat en egl – augmenta la visibilitad.
• Sper la chapellina obligatorica protegian guants, stivals, ina giacca ed ina chautscha da moto – munidas cun protecturs – da blessuras.
• Adattar la sveltezza al trassé, a las relaziuns da via ed a l'atgna abilitad da manischar ed observar las prescripziuns legalas.
• Betg provocar situaziuns ristgadas!