A partir dal glindesdi, ils 12 d'avust 2024, èsi puspè uschè lunsch. En bleras parts dal Grischun cumenza in nov onn da scola. Millis d'uffants fan per l'emprima giada la via da scola u da scolina. La Polizia chantunala dal Grischun vegn puspè a rinforzar sia preschientscha en la vischinanza da las scolinas e da las chasas da scola.

 

In terz dals grevs accidents da traffic sin via cun uffants capita sin la via da scola. A chaschun dal cumenzament da la scola tira la Polizia chantunala dal Grischun endament, che la segirezza dals uffants en il traffic sin via va tiers a nus tuts. Cumbain ch'ils geniturs han ina rolla impurtanta en connex cun la segirezza dals uffants, han er las manischunzas ed ils manischunzs la responsabladad.

Ils uffants na pon betg surpigliar la responsabladad per lur segirezza, perquai che las situaziuns èn memia cumplexas e l'intensitad dal traffic è memia gronda. Plinavant n'èn la capacitad da percepir e l'abilitad da sa concentrar sco er la conscienza dals privels anc betg sviluppadas dal tuttafatg tar ils uffants.

Er quest onn sustegna la Polizia chantunala dal Grischun la campagna per la via da scola «sa fermar per ils uffants da scola». Questa acziun da l'Associaziun Traffic ed Ambient e da Mobilitad da peduns Svizra vegn realisada per incumbensa dal Fond svizzer per la segirezza stradala.

Tuts pon contribuir a dapli segirezza:

ils geniturs

• tscherner la via la pli segira
• exercitar la via da scola cun ils uffants avant l'emprim di da scola
• accumpagnar ils uffants uschè ditg ch'igl è necessari
• betg manar ils uffants cun l'auto a scola

las manischunzas ed ils manischunzs

• adattar la sveltezza e charrar en moda defensiva en ils conturns da las scolas
• adina fermar dal tuttafatg als lieus ch'èn destinads per traversar la via; da la polizia emprendan ils uffants numnadamain da traversar la via pir, cura che las rodas na sa movan betg pli.
• desister da far segns cun ils mauns, per che l'uffant possia sa concentrar sin l'ulteriur traffic

Dapli preschientscha da la polizia al cumenzament da la scola

Per segirar las vias da scola e per proteger las pli giuvnas participantas ed ils pli giuvens participants dal traffic, vegn la Polizia chantunala dal Grischun a far dapli controllas da sveltezza e survegliar las vias da scola en las vischnancas. Parallelamain visitan ils instructurs da traffic da la Polizia chantunala dal Grischun tut las scolinas e mussan als uffants, co ch'els ston sa cuntegnair per traversar la via.