La Polizia chantunala ha preschentà la Statistica criminala da la polizia dal chantun Grischun 2024. L'onn da gestiun èn ils delicts registrads da la polizia en il chantun Grischun sa reducids per circa 5 % cumpareglià cun l'onn precedent. Dals totalmain 10 088 delicts ch'èn vegnids commess en il sectur dal Cudesch penal, èn dus terzs delicts da facultad. Da valitar en moda positiva è il fatg, ch'ils grevs delicts da violenza èn sa reducids per 9 % ed ils delicts sexuals per 29 %. La chargia da center da la regiun da Cuira sa mussa puspè cleramain, tuttina po vegnir constatada ina reducziun da la criminalitad.

En il chantun Grischun èn vegnids registrads 12 599 delicts l'onn passà. La gronda part èn malfatgs cunter il Cudesch penal, numnadamain 10 088 (onn avant: 10 528). Il regress da l'activitad delictuala po vegnir constatà er en la regiun da Cuira. Uschia han ins registrà en questa regiun ina reducziun da 15 % tar ils delicts tenor il Cudesch penal ed ina tala da 53 % tar las cuntravenziuns cunter la Lescha da narcotics. Quasi la mesadad da tut ils delicts cunter il Cudesch penal (47 %) e dals delicts cunter la Lescha da narcotics (48 %) èn vegnids commess da burgaisas e burgais svizzers.

Dus terzs dals delicts tenor il Cudesch penal pertutgan la facultad
Il dumber dals delicts da facultad è bain sa reducì l'onn 2024 per 2 %, i ha dentant anc adina dà 6704 delicts. La gronda part dals malfatgs da facultad èn enguladitschs da vehichels, numnadamain 1142 (1051) ed enguladitschs generals cun 2661 (2772). Cunzunt tar ils enguladitschs en negozis cun 573 (+15 %), ils enguladitschs davent da vehichels cun 200 (-15 %) e tar ils enguladitschs cun infracziun da vehichels cun 223 (+125 %) sa tracti da delicts da massa che strapatschan fermamain las resursas persunalas da la Polizia chantunala. Per pudair drizzar il focus er vinavant sin las investigaziuns da delicts mesauns e grevs, è ina rapportaziun efficazia tar ils delicts da massa da gronda relevanza.

Reducziun tar ils delicts da drogas – il cocain resta attractiv
Er las cifras en il sectur da las cuntravenziuns cunter la Lescha da narcotics, che sa movan dapi plirs onns pli u main sin il medem nivel, èn sa reducidas l'onn 2024 per 39 %. Quai vala tant per il consum 578 (1004) sco er per il commerzi 141 (173). Dals totalmain 721 (1185) delicts èn 273 (38 %) vegnids registrads en la regiun da Cuira, 164 (23 %) en la regiun Rain-Moesa e 135 (19 %) en la regiun Grischun central. Consumads vegnan principalmain products da chonv (marihuana, haschisch) e meds stimulants (cocain, ecstasy, amfetamin e.u.v.). En il commerzi cun narcotics èn stimulants represchentads il pli fitg cun ina quota da passa 50 %. Quest svilup è d'attribuir tranter auter a la gronda disponibladad ed als pretschs bass dal cocain e po vegnir observà dapi intgins onns tant sin plaun internaziunal sco er naziunal.

In delict da mazzament empruvà e reducziun tar ils delicts sexuals
Cun 686 (-2 %) èn ils delicts da violenza dapi intgins onns sin in nivel constant. Cumbain ch'igl è vegnì cumprovà mo in delict da mazzament empruvà e cumbain ch'ils delicts grevs da violenza èn sa reducids per tut en tut 9 %, mussan las grevas blessuras corporalas in augment da 23 %. 84 % dals delicts cun greva violenza èn vegnids commess dad umens. La quota da scleriment importa 100 %. Allegraivla è er la diminuziun dals delicts sexuals da 29 %, quai tar ina quota da scleriment da passa 90 %.

En connex cun violenza a chasa èn vegnids registrads 232 (246) delicts penals l'onn 2024. Er sche quai correspunda ad ina reducziun da 6 %, èn s'augmentadas las intervenziuns da la polizia en il sectur chasan. La mesadad da tut ils cas da violenza a chasa pertutgan relaziuns da partenadi, 25 % anteriurs partenadis.

Reducziun da las cifras en il sectur da la criminalitad digitala
Cumpareglià cun l'onn 2023 è il dumber da delicts en il sectur da la criminalitad digitala sa reducì per 5 % a 1087 (1139) cas registrads. Passa 94 % dals delicts pertutgan la cybercriminalitad economica. Da quels èn 718 malfatgs d'attribuir al cyberengion. Latiers tutgan tranter auter ils engions sin plattafurmas d'inserats pitschens, ils engions d'investiziun online, ma er il romance scam. En 74 cas (+110 %) è vegnì cumprovà il causal d'in access illegal en in sistem d'elavuraziun da datas.

Sfidas dal cumbat cunter la criminalitad en il context actual
La midada sociala, il svelt progress tecnologic sco er las cundiziuns generalas giuridicas signifitgan actualmain ina gronda sfida per ils corps da polizia en il cumbat cunter la criminalitad. Il spectrum dals delicts tanscha da delicts da massa en ils secturs d'engion sin plattafurmas d'inserats pitschens u d'enguladitschs en negozis, fin ad investigaziuns cumplexas en il sectur da la criminalitad fitg greva en connex cun la criminalitad organisada. Per pudair lavurar er en l'avegnir cun success ed en moda effizienta ed effectiva en il cumbat cunter la criminalitad, dovri ina collavuraziun sin differents plauns. Premissas èn tranter auter

• dapli sustegn da vart da la politica naziunala e chantunala cun la finamira da crear cundiziuns generalas legalas che permettan da cumbatter la criminalitad en moda effizienta ed effectiva en il context pretensius e cumplex: per exempel en ils secturs tematics barat d'infurmaziuns e da datas polizialas entaifer il chantun e tranter ils chantuns, en la regulaziun da plattafurmas d'internet u en l'applicaziun da tecnologia d'infurmaziun specifica per pudair impunder las resursas persunalas cun cleras finamiras e cun quità.
• il rinforzament e la coordinaziun da la collavuraziun tranter ils corps da polizia en dumondas strategicas, persunalas ed operativas per trair a niz sinergias e per optimar l'activitad d'investigaziun.
• la realisaziun da mesiras concretas en ils corps da polizia, sco per exempel metter il focus sin metodas preventivas per impedir u per interrumper activitads delictualas, ina priorisaziun dals cas en la repressiun concernent retschertgas empermettentas sco er ina concentraziun dals process administrativs per pudair impunder cun cleras finamiras las resursas persunalas qualifitgadas.