Charas visitadras e chars visitaders

L'administraziun chantunala dal Grischun è dapi l'onn 2013 activa sin differents chanals socials. Sur las medias socialas (social media) vulan la Regenza e l'administraziun rinforzar en spezial il dialog cun las burgaisas ed ils burgais sco er cuntanscher ellas ed els meglier e pli svelt. Sur quests chanals prendain nus er gugent encunter critica, laud e propostas da tut gener.

Ils chanals da las medias socialas vegnan tgirads da differents uffizis da l'administraziun chantunala. Redacturas e redacturs da las medias socialas publitgeschan cuntegns e tgiran il dialog cun las visitadras ed ils visitaders. Sin la pagina d'internet dal Servetsch da communicaziun chattais Vus ina survista dals accounts da social media.

Utilisaziun

 Nus As supplitgain da resguardar che nus stizzain texts, maletgs, videos e commentaris che na correspundan betg a las reglas da community uffizialas da Facebook, Twitter, Instagram, LinkedIn u YouTube u che cuntrafan a nossa Netiquette.

 En spezial na tolerain nus naginas contribuziuns

•  ch'èn maldeschentas, obscenas u pornograficas, smanatschantas, discriminantas, rassisticas, offendentas, che mainan en errur u ch'èn illegalas,
•  che instigan da duvrar violenza,
•  che cuntrafan als dretgs d'autur, als dretgs persunals u ad auters dretgs da terzas persunas u
•  che cuntegnan reclama per products da terzas persunas.

 Tgi che cuntrafa gravantamain u repetidamain a questas reglas, vegn exclus da l'ulteriura utilisaziun. Critica constructiva sco er dumondas da tut gener vegnin nus ad acceptar gugent ed a respunder.