Champ d'incumbensas
Ti lavuras al Plantahof a Landquart. Qua emprendas ti tut davart la tgira da las vits fin a la commerzialisaziun dal vin.
Tias fermezzas èn
- Plaschair da lavurar en il liber
- Bun dun d'observar quai che capita en la natira
- Inschign manual
- Chapientscha tecnica per maschinas e per urdains
- Sanadad robusta per lavurar sut tschiel avert da tut las auras
- Forza corporala
- Bun nas e bun palat (per degustar)
Accents da la scolaziun
Ti emprendas, quant impurtant ch'il tagl correct da las vits è per la racolta, sauas, ladas e tgiras culturas. Er il terren sto vegnir cultivà bain e ti cumbattas cunter parasits en moda efficazia e tuttina ecologica.
Suenter la vendemia vegnan ils products torclads, tgirads, raffinads e controllads dal torclar sur la fermentaziun fin a l'emplenida en buttiglias ed al deposit.
Ti emprendas ad enconuscher las pretensiuns dal martgà ed enconuschas las tecnicas per raffinar vin e las tendenzas dals gusts.
Scolaziun
| Durada: |
3 onns |
| Scola: |
curs da bloc da pliras emnas en il center da furmaziun professiunala Wädenswil BZW.
La furmaziun da basa po er vegnir absolvida cun l'agricultura biologica sco tema central.
Curs intermanaschials davart differents temas.
|
| Finiziun: |
attestat federal da qualificaziun "viticultura/viticultur AFQ" |
Pretensiun
- Scola populara terminada
- Cun in attestat federal da qualificaziun (AFQ) d'ina autra professiun agricula po sa scursanir la scolaziun da viticultura/viticultur AFQ ad 1 onn
- Cun in attest federal da furmaziun professiunala agricula (AFP), cun in attestat federal da qualificaziun (AFQ) d'ina autra professiun u cun in examen da maturitad sa reducescha la scolaziun da viticultura/viticultur AFQ per regla a 2 onns
Pussaivladads d'absolver furmaziuns supplementaras suenter l'emprendissadi
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:
- Curs dal Strickhof, Au ZH, da l'Institut für Umwelt und Natürliche Ressourcen IUNR (ZHAW), Wädenswil, e da la École d'Ingénieurs de Changins (HES-SO)
- Suenter la finiziun da la furmaziun da basa po vegnir absolvida ina furmaziun da basa scursanida dad 1 onn en in'autra professiun agricula
- Mainagestiun da la viticultura u da la tecnologia da vin cun certificat professiunal federal u in auter examen professiunal en il champ professiunal da l'agricultura
- Maistra/maister da viticultura, maistra tschalerera/maister tschalerer u in auter examen professiunal superiur en il champ professiunal da l'agricultura
- Tecnicista/tecnicist da viticultura SSS dipl., agrotecnicra/agrotecnicher SSS dipl., commerzianta/commerziant d'agricultura SSS dipl.
- Bachelor of science (SAS) en enologia, bachelor of science (SAS) en agronomia (p.ex. approfundaziun en planticultura), bachelor of science (SAS) en inschigneria da l'ambient (p.ex. approfundaziun en agricultura biologica ed en orticultura biologica)