Assistent/-a per il mantegniment d'autos AFP
Champ d'incumbensas
Ti lavuras tar l'uffizi da construcziun bassa ed es là responsabla/responsabel per simplas lavurs da service e per las reparaturas dals differents vehichels, sco autos da persunas e da squadra, camiuns e schlavazzuns.
Tias fermezzas èn
- Senn per connexs tecnics
- Inschign manual
- Moda da lavurar conscienziusa ed exacta
- Fidadadad e senn da responsabladad
- Abilitad da lavurar en in team
Accents da la scolaziun
Ti controllas e reparas motors, tracziuns e schassis. Sco assistenta/assistent per il mantegniment d'autos midas ti l'ieli, mesiras il livel da l'ieli ed unschas las parts mobilas dal motor. Ti remplazzas pneus isads, fas lavurs da mantegniment vi da l'illuminaziun, vi da l'indriz da climatisaziun, vi dals sistems da ventilaziun, d'envidada e d'injecziun. Ti gidas a smontar ed a montar motors e rodams. Sut la direcziun da persunas superiuras remplazzas ti ultra da quai elements dals frains, dal guvernagl, da la suspensiun da las rodas e da las pennas.
La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.
Scolaziun
| Durada: |
2 onns |
| Scola: |
1 di per emna a la scola professiunala spezialisada
differents curs intermanaschials |
| Finiziun: |
attest federal da furmaziun professiunala |
Pretensiun
- Scola populara terminada
- Test da qualificaziun UPSA
Pussaivladads d'absolver furmaziuns supplementaras suenter l'emprendissadi
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:
- Curs da l'uniun professiunala svizra da l'automobil (UPSA) e da las scolas professiunalas spezialisadas
- Assistentas/assistents per il mantegniment d'autos AFP pon far ina furmaziun da basa scursanida sco spezialista/spezialist d'autos AFQ cun attestat federal da qualificaziun (entrada en il 2. onn da la furmaziun da basa)
Suenter pon vegnir absolvidas las medemas furmaziuns supplementaras sco per spezialista/spezialist d'autos AFQ.