Il Leadership Forum è in'occurrenza che dat la chaschun da discutar davart temas actuals e sfidas dal temp e da sa barattar areguard experientschas.

Il mund da lavur sa mida cuntinuadamain. Perquai è il Leadership Forum stà quest onn cumplainamain en il focus da la revisiun da la strategia dal persunal da l'administraziun chantunala dal Grischun. Durant dus dis han referats d'input da persunas internas ed externas, differentas discussiuns al podium e lavuratoris attractivs manà a discurs interessants ed in viv barat. Questa occurrenza interdepartamentala porscha mintgamai la chaschun optimala da s'occupar a moda cumplessiva d'in tema. Quai contribuescha plinavant ad ina meglra chapientscha vicendaivla en il mintgadi da lavur. Plinavant pon vegnir iniziadas ed approfundadas en quest connex raits preziusas sin il champ professiunal e social.

Ina strategia da persunal confurma al temp è d'impurtanza decisiva per pudair concepir a moda effectiva il management dal persunal. Quai pretenda ina consideraziun cumplessiva da las finamiras e da las valurs da l'administraziun chantunala dal Grischun. L'emprim èsi impurtant d'identifitgar las pretensiuns actualas e futuras en connex cun il mund da lavur. Silsuenter pon ins definir e prender mesiras adattadas. Ina clera planisaziun e procuraziun dal persunal èn indispensablas per gudagnar ils dretgs talents. Ultra da quai duai la strategia cumpigliar mesiras per il svilup dal persunal e per liar las collavuraturas ed ils collavuraturs cun l'interpresa sco era per crear ina cultura da manaschi positiva. En quest connex èsi impurtant da resguardar aspects sco la diversitad, l'egualitad da las schanzas e l'engaschament da las collavuraturas e dals collavuraturs. Per pudair porscher adina servetschs d'auta qualitad ed uschia satisfar en il senn pli vast a las pretaisas da nossas burgaisas e noss burgais che sa midan d'in cuntin èsi decisiv da survegliar ed adattar cuntinuadamain la strategia dal persunal.