Cliccai ils singuls titels per survegnir dapli infurmaziuns davart il tema.

Infurmaziuns generalas

Mobing po pertutgar mintgina e mintgin da nus, dependa da la situaziun e sa mussa independentamain da caracteristicas persunalas da la persuna pertutgada.

Mobing è in cumportament intenziunà, sistematic ed ostil durant in temp pli lung, cun l'intenziun d'isolar u d'excluder u schizunt d'eliminar ina persuna da ses plaz da lavur.

Caracteristicas tipicas dal mobing pertutgan:

• La pussaivladad da communitgar: betg laschar discurrer a fin, interrumper permanentamain, sbragir si per la persuna, retegnair infurmaziuns.
• Las relaziuns socialas en la situaziun da lavur: refusar generalmain il contact, ignorar, excluder, isolar.
• La reputaziun sociala: ridiculisar, derasar famas, dar tuccas, offender, far remartgas spretschantas.
• La qualitad da la situaziun professiunala e da vita: attribuir lavurs schicanusas e degradantas, exprimer critica nungiustifitgada, retrair lavurs impurtantas.
• La sanadad (psichica): smanatschar violenza corporala, agressiuns, mulestas sexualas.

Mobing sa differenziescha dals conflicts, che resultan e ston vegnir schliads en mintga situaziun da lavur. Sch'i sa tracta en ina situaziun difficila da mobing u betg, n'è betg adina cler. Betg mintga cumportament sbaglià è mobing.

Tge poss jau far?

Discutai cun persunas da confidenza e / u faschai diever d'ina da las purschidas per las collavuraturas ed ils collavuraturs dal chantun Grischun, che Vus chattais sin la pagina d'internet "Post da consultaziun / d'annunzia".

A las infurmaziuns dal Secretariat da stadi per l'economia (SECO):

Mobing

Mobing ed autras mulestas – protecziun da l'integritad persunala al plaz da lavur

Glista da controlla – protecziun da l'integritad persunala al plaz da lavur