Mulestas sexualas al plaz da lavur

Männliche Hand legt sich auf weibliche Hand über eine Tastatur

Cliccai ils singuls titels per survegnir dapli infurmaziuns davart il tema.

Infurmaziuns generalas

Mulestas sexualas al plaz da lavur èn ina furma speziala da la discriminaziun. Sco mulestas sexualas al plaz da lavur valan tut ils cumportaments cun connex sexual, ch'èn per ina persuna nungiavischads e che violeschan la dignitad da tala.

Las mulestas pon avair lieu durant la lavur, a chaschun d'occurrenzas da manaschi u sin il viadi a la lavur. Er contacts nungiavischads ordaifer il temp da lavur pon vegnir valitads sco mulestas sexualas (p.ex. via SMS u medias socialas). Tals contacts pon derivar da collavuraturas e collavuraturs, da persunas superiuras u da clientas e clients.

Mulestas sexualas pon vegnir commessas cun pleds, gests u acziuns e pon avair differentas furmas.

Allusiuns sexualas, remartgas indecentas ed ambiguas davart l'apparientscha, davart qualitads corporalas u deblezzas.
Remartgas e sgnoccas sexisticas davart caracteristicas sexualas, davart il cumportament sexual u davart l'orientaziun sexuala.
Egliadas insistentas e taxantas, persecuziuns.
Mussar, exponer e trametter material pornografic.
Intimaziuns ambiguas.
Contacts corporals insistents e nungiavischads.
Invitaziuns nungiavischadas cun intenziun sexuala.
Tentativas d'avischinaziun che vegnan fatgas cun l'empermischun d'avantatgs u cun la smanatscha da dischavantatgs.
Agressiuns sexualas, constricziun, violaziun.

Las mulestas sexualas n'han nagut da far cun in flirt, cun in clima da lavur luc u cun amur, mabain èn ina inobservanza dals cunfins persunals d'ina persuna. Quests cunfins persunals fixescha mintga persuna individualmain. Uschia poi esser, ch'ina acziun senza motiv sexual vegn chapida sco tala. Da dadora n'è quai betg adina facil da distinguer. I dat dentant ina regla simpla per giuditgar ina situaziun:

Betg l'intenziun da l'acziun è decisiva, mabain co ch'ella vegn resentida dal visavi.

En il giudicament na dependi pia betg da l'intenziun da la persuna che agescha, mabain co che la persuna pertutgada resenta il cumportament. Per il giudicament giuridic vegn applitgada in'optica objectivada. I vegn dumandà, sch'ina persuna media raziunala (tut tenor la situaziun feminina u masculina) en Svizra considerass il cumportament da giuditgar sco mulesta sexuala.

Tge poss jau far?

Il chantun Grischun recumonda a las persunas pertutgadas da sa laschar cussegliar en in emprim pass d'ina persuna da confidenza dal Post da cussegliaziun psicologica.

Ina persuna da confidenza dat infurmaziuns impurtantas e po gidar a valitar eveniments e situaziuns ed a sviluppar strategias e soluziuns, po mussar opziuns e purschidas da sustegn ed er infurmar davart las consequenzas.

Ina persuna da confidenza po sustegnair las collavuraturas ed ils collavuraturs pertutgads da far in'annunzia ad ina persuna superiura u al Post per l'annunzia d'incunvegnientschas en il sectur dal persunal.