Il martgà dal transport da rauba en il Grischun è caracterisà d'ina vasta e fitg sparpagliada rait d'abitadis sco er da manaschis industrials e commerzials. Ils pli gronds lieus da producziun e da destinaziun sa chattan en la Val dal Rain Grischuna ed en las valladas pli grondas da Tavau, da l'Engiadin'Ota, dal Partenz, sco eventualmain er a Glion ed a Tusaun. Ordaifer la Val dal Rain Grischuna è l'infrastructura da transport caracterisada fermamain dal territori alpin e sa restrenscha – tras tunels e sur pass – sin las axas principalas e sin las structuras da las vals. Ultra da las axas da traffic chantunalas per l'access intrachantunal ha il chantun Grischun cun la A13 ina fitg ferma axa da transit nord-sid. Sin quella vegnan realisads in grond dumber da transports surregiunals. Ultra da l'avertura stradala renda la Viafier retica accessibel quasi l'entir chantun Grischun cun il tren. Quai pussibilitescha da porscher servetschs da transport da rauba sin binaris en ina gronda part dal chantun Grischun.

Ulteriuras infurmaziuns datti en il Concept da transport da rauba dal chantun Grischun.