La not dals 10 sin ils 11 d`october 2023 ha la surveglianza chantunala da chatscha sajettà dus lufs giuvens dal triep da Moesola entaifer il perimeter permess. L'Uffizi federal d'ambient (UFAM) aveva permess ils 18 d'avust 2023 da sajettar els.

Per l'analisa patologica vegnan ils lufs sajettads ussa transferids al Center per medischina da peschs e selvaschina (FIWI) a Berna. L'analisa genetica vegn fatga al Laboratoire de biologie de la conservation da l'Universitad da Losanna.