Persuna da contact per las acquisiziuns publicas
Orlando Nigg, manader dal center da cumpetenza acquisiziuns e projects (+41 81 257 36 18)
- post d'infurmaziun per las acquisiziuns publicas: assistenza, cussegliaziun e coordinaziun da tut ils departaments, posts da servetsch ed instituziuns sco er da vischnancas e d'ulteriuras partidas interessadas en il sectur da las acquisiziuns publicas
- occurrenzas d'infurmaziun en il sectur da las acquisiziuns publicas
- scolaziun e furmaziun supplementara da las persunas ch'èn responsablas per las acquisiziuns publicas en il chantun
- manar ina glista da purschiders bloccads
- tgira da las statisticas davart surdadas en il chantun
Post d'annunzia per abus tar las acquisiziuns
Tenor il dretg d'acquisiziun chantunal (art. 4 ORtLItCIAP) pon abus tar acquisiziuns publicas vegnir annunziads ad in post d'annunzia extern independent (interpresa da revisiun da quints BDO SA, partiziun da compliance, Turitg), quai sur ina plattafurma electronica segirada. Sco abus valan cunzunt cunvegnas da concurrenza u da corrupziun tar las acquisiziuns dals incumbensaders publics (chantun, vischnancas, purtaders d'incumbensas publicas e.u.v.). Ma er ils conflicts d'interess betg declerads u autras proceduras penalmain relevantas tar proceduras d'acquisiziun pon vegnir annunziads cun u senza inditgar il num.
La BDO SA examinescha silsuenter il cuntegn da l'annunzia. Sch'i dat in suspect inizial suffizient, transmetta ella l'annunzia a l'instanza da surveglianza cumpetenta u a l'autoritad d'inquisiziun.
Tut las ulteriuras infurmaziuns per in'annunzia chattais Vus directamain en il portal d'internet extern.
Novas prescripziuns d'acquisiziun per incumbensaders publics a partir dal 1. d'october 2022
A partir dal 1. d'october 2022 valan novas reglas d'acquisiziun per ils incumbensaders publics en il chantun Grischun. Per quest termin ha la Regenza declerà da sa participar a la Cunvegna interchantunala revedida davart las acquisiziuns publicas (CIAP 2019) e mess en vigur las disposiziuns executivas chantunalas necessarias. Sco consequenza vegn la legislaziun chantunala da submissiun vertenta abolida per ils 30 da settember 2022. Las novas basas legalas sco er la missiva da la Regenza chattais Vus qua sut. Ulteriuras infurmaziuns davart il nov dretg d'acquisiziun vegnan messas a disposiziun cuntinuadamain sin questa pagina (fegls d'infurmaziun, mussavia davart las acquisiziuns, links e.u.v.).
Tras la participaziun a la CIAP presta il Grischun ina contribuziun impurtanta per armonisar il dretg d'acquisiziun en Svizra. Da quai profitan en plirs reguards tant l'economia sco er ils posts d'acquisiziun. Las prescripziuns d'acquisiziun revedidas s'orienteschan pli fitg tenor aspects da qualitad, da persistenza e d'innovaziun.
Program da statistica per annunziar surdadas d'incaricas
Tenor l'art. 15 da l'Ordinaziun tar la Lescha introductiva tar la Cunvegna interchantunala davart las acquisiziuns publicas (ORtLltCIAP) ston vegnir communitgadas al departament d'infrastructura, energia e mobilitad dal Grischun (DIEM) tut las surdadas da passa 50 000 francs tras ils incumbensaders publics. A maun da las surdadas annunziadas fa il DIEM mintga onn ina statistica e transmetta quella als circuls interessads.
Per transmetter las surdadas ch'èn d'annunziar stat a disposiziun als incumbensaders publics sut https://www.vergabestatistik.ch/gr dapi il fanadur 2016 in program da statistica en l'internet.
Sch'in incumbensader na posseda betg anc l'autorisaziun d'access al program da statistica, po el dumandar sut vergabestatistik@diem.gr.ch in access per ils utilisaders internamain cumpetents (inditgond: l'adressa ed il e-mail da l'incumbensader sco er il num, il numer da telefon, il e-mail e la lingua dals utilisaders).