Cun la campagna "Fairtrail" fa il chantun a partir d'immediat reclama per toleranza e per ina convivenza patgifica tranter ciclists e viandants sin las sendas da viandar e sin ils trails dal Grischun. L'offensiva da scharm desista dal tuttafatg d'avertiments. Fairtrail lavura cun in'autoironia simpatica e cun ina detga purziun umor grischun.

Il viandar e l'ir cun velo na survegnan betg mo en la purschida turistica da stad dal Grischun adina dapli impurtanza. Er per la populaziun indigena tutgan il viandar e l'ir cun velo durant la stad tar las occupaziuns da temp liber las pli appreziadas. I na fa pia betg smirvegliar che intginas da las vias e sendas èn da dis da bell'aura uschè fermamain frequentadas, che las viandantas, ils viandants, las ciclistas ed ils ciclists vegnan da temp en temp en pes in a l'auter. E quai malgrà la fitg gronda rait da vias cun 11 000 kilometers sendas da viandar signalisadas e passa 100 rutas da velo da muntogna signalisadas. Separar las vias n'è betg adina pussaivel. Construcziuns novas cumplessivas na pon – gia per motivs da la protecziun da la natira – betg adina esser la soluziun. Sco en auters secturs da la vita, nua che relaziuns da spazi stretgas ed il stress da densitad pon chaschunar da temp en temp conflicts, èn dumandads toleranza e resguard er sin las vias e sendas dal Grischun per cuntanscher ina coexistenza paschaivla. Per quai stat fairtrail.

Campagna turistica per dapli toleranza

La campagna dals projects grischunHIKE e grischunE-MTB che dura plirs onns vegn realisada da l'uffizi da construcziun bassa dal Grischun sco post spezialisà per il traffic betg motorisà, en collavuraziun cun ils furniturs da prestaziuns turisticas dal chantun.

En il rom da la campagna duain vegnir animads directamain las viandantas, ils viandants, las ciclistas ed ils ciclists cun differents meds per ina convivenza correcta e plain respect sin las vias e sendas cuminaivlas. Cun ina pitschna broschura vegni rendì attent a las relaziuns spezialas en il Grischun e preschentada la regla generala da cumportament "plaschaivel, net e pront!". Cartas postalas spezialas mussan la convivenza en moda comica ed ironica. Cun pitschens regals da reclama sco tatgaders, buttuns e scalins da velo da fairtrail duain las differentas utilisadras ed ils differents utilisaders da las vias e sendas vegnir sensibilisads per "fairtrail".

Visibel dapertut

En in emprim pass vegnan ils differents meds da sensibilisaziun exponids tar ils furniturs da prestaziuns turisticas e distribuids directamain sur ulteriurs circuls interessads. A chaschun d'occurrenzas da viandar e da velo da muntogna vegn il team accumpagnant da guids scolads da fairtrail a propagar la visiun da fairtrail en il discurs direct cun las participantas ed ils participants. A hotspots sin vias e sendas da viandar e da velo da muntogna duain els dentant er procurar al lieu che la regla da cumportament "plaschaivel, net e pront" vegnia observada. Il tema vegn natiralmain er tractà e derasà en las medias socialas, en spezial cun il hashtag #fairtrailgraubünden.

Per l'onn proxim èn planisadas ulteriuras acziuns. Ch'il viandar e l'ir cun velo en il Grischun daventan pli e pli populars è evident, ed uschia vegnan er ils temas resguard e toleranza sin la rait da vias e sendas da viandar a survegnir dapli impurtanza en il futur.

Documentaziun campagna Fairtrail