En il chantun Grischun han ins enconuschì baud il potenzial da questa disciplina da sport. Cun il project NPR graubünden Trailrun resp. cun l'interpresa Zenit run sco purtadra dal project è vegnì dà l'onn 2020 l'impuls per in svilup intensiv. E sco studis actuals mussan, porta il project fritgs. L'onn 2023 è il chantun Grischun per l'emprima giada stà a la testa dal ranking da quels chantuns, nua ch'il dumber da curridras e curriders da trailrun è s'augmentà il pli fitg. En total han ins elavurà 11 champs d'acziun e 53 mesiras e stgaffì purschidas captivantas ch'èn vegnidas implementadas en collavuraziun cun las destinaziuns e cun ils purtaders da las purschidas: dal trail signalisà sur ils trenaments per principiantas e principiants «let's trail», fin al cudesch d'uffants «Jori trailt los» – per mo numnar ina pitschna schelta. En il fratemp è la disciplina da sport sa sviluppada uschè fitg, ch'ins na discurra betg pli d'in boom, mabain d'ina disciplina da sport etablida.
Al cumenzament dal project «graubünden Trailrun» era la finamira quella d'etablir e da rinforzar strategicamain las cundiziuns generalas sin plaun chantunal, per ch'ina buna purschida turistica funcziuneschia sin mintga stgalim ed oravant tut a la basa. Il Grischun dueva trair a niz ils potenzials dal sport da trailrunning e sa posiziunar sco regiun da trailrunning. Il focus era mess sin l'elavuraziun d'infurmaziuns da basa sco er da concepts da realisaziun che permettan als partenaris participads da concepir en moda effizienta il turissem da trailrunning. Cun utilisar sinergias ed enconuschientschas specificas sco er cun coordinar sistematicamain ils partenaris ed ils furniturs da prestaziuns han ins pudì iniziar ina dinamica da svilup.
Cun la terminaziun dal project «graubünden Trailrun» èsi pussaivel da guardar enavos sin in viadi inspirant da 4 onns, che ha posiziunà il Grischun en moda persistenta sco hotspot dal trailrunning en il territori alpin germanofon. La planisaziun e realisaziun conscienziusa da las bleras mesiras n'han betg mo consolidà il trailrunning sco disciplina da sport, mabain er rinforzà la valurisaziun locala ed il sentiment da coesiun. Per mantegnair las basas consolidadas dal project e per pudair cuntinuar cun las mesiras instradadas er suenter la fin dal project, han ins fundà il mars 2024 l'Uniun graubünden Trailrun. En l'avegnir vegn questa uniun a coordinar tut ils interess e las dumondas dal sectur trailrunning en il chantun Grischun, sco er a structurar las differentas activitads e mesiras ed a nizzegiar uschia sinergias, resp. a rinforzar vinavant la community. Tut las curridras ed ils curriders da trailrun, las destinaziuns turisticas, las organisaziuns d'occurrenzas, las guidas ed ils guids, las butias da sport ed ils purschiders da turas èn envidads da sa participar activamain a l'uniun e d'uschia cunconcepir il futur dal trailrunning en il Grischun.