Las votantas ed ils votants dal Grischun han approvà ils 30 da november 2014 la legislaziun executiva tar la refurma dal territori. Cun la legislaziun executiva è vegnida concretisada ina revisiun parziala da la constituziun chantunala, la quala era vegnida acceptada da las votantas e dals votants gia ils 23 da settember 2012. La regenza ha concludì da metter en vigur il pachet total per il 1. da schaner 2016. 

Las 11 regiuns novas pon daventar activas operativamain il 1. da schaner 2016. Sco purtadras da las incumbensas stattan ellas a disposiziun tant per incumbensas communalas sco er chantunalas e remplazzan ils 39 circuls, las 14 corporaziuns regiunalas ed ils 11 districts.

Pervia da la data d'entrada en vigur ston differents termins vegnir resguardads: 35 circuls vegnan abolids per l'onn 2016 sco corporaziuns. Ils 4 circuls da la Tumleastga, dal Mesauc, da l'Engiadin'ota e dal Surses vegnan a restar percunter fin ils 31 da december 2017, perquai ch'els adempleschan incumbensas surcommunalas Ils circuls furman vinavant las unitads electoralas per l'elecziun dal cussegl grond. Las regiuns ston realisar las elecziuns en las unitads electoralas respectivas. Las corporaziuns regiunalas vegnan schliadas il pli tard la fin da l'onn 2017. Las revisiuns da leschas ch'èn decisivas per las dretgiras regiunalas (sco successuras da las dretgiras districtualas) vegnan fatgas en il rom d'ina revisiun parziala da la lescha davart l'organisaziun giudiziala. En il fratemp è vegnida lantschada la consultaziun. La realisaziun vegn fatga per il 1. da schaner 2017.

Las lavurs preparatoricas per las novas regiuns vegnan fatgas d'in gremi transitoric. Da quel fan part las presidentas ed ils presidents communals da las vischnancas da la regiun futura. L'uschenumnà organ transitoric sa constituescha sez; el sto garantir che la regiun funcziuna gist dal cumenzament. Per che l'organ transitoric possia far en moda legalmain valaivla las lavurs preparatoricas necessarias, vegnan messas en vigur las disposiziuns transitoricas da la lescha da vischnancas gia ordavant, q.v.d. per il 1. da favrer 2015.


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01, E-Mail: barbara.janom@dfg.gr.ch 
 

Gremi: regenza
Funtauna: rg chanzlia chantunala dal Grischun