Las suandantas categorias da persunas dal sectur d'asil han access a la cussegliaziun per il return:

• requirentas e requirents d'asil cun ina procedura pendenta
• requirentas e requirents d'asil ch'èn vegnids refusads
• persunas cun ina decisiun da betg entrar en chaussa
• persunas ch'èn admessas provisoricamain
  
• fugitivas e fugitivs renconuschids

Dapi il 1. d'avrigl 2008 han tschertas gruppas da persunas en il sectur da las persunas estras medemamain access a la cussegliaziun per il return. Quai èn las victimas e las perditgas dal commerzi cun umans sco er las sautunzas ed ils sautunzs da cabaret che sa chattan en ina situaziun d'explotaziun en Svizra.
 

Il post da cussegliaziun per il return sto procurar che las persunas pertutgadas vegnian infurmadas a temp e regularmain en la procedura d'asil davart l'agid per il return, davart ils aspects dal sectur d'asil sco er davart las mesiras executivas.
 

Il post da cussegliaziun per il return sa stenta plinavant per che las autoritads chantunalas e communalas sco er las ulteriuras instituziuns che lavuran per incarica publica sajan al current davart las finamiras e davart las mesiras da l'agid per il return.

Questa noziun signifitgescha la cussegliaziun individuala da persunas interessadas pertutgant las pussaivladads da returnar en lur patria ord vista finanziala, tecnica ed organisatoria. En quest connex duai la prontezza concreta da returnar vegnir promovida en il cas singul. I duain vegnir inditgadas soluziuns ed i duain vegnir rinforzadas l'atgna responsabladad sco er l'independenza per planisar e per realisar il return voluntar u obligatori.