A partir da cura discurran ins da persunas che assistan lur confamigliars e tge chapeschan ins sut ina persuna che basegna tgira? La suandanta part stgaffescha clerezza e mussa la diversitad dal tema. Ultra da quai illuminescha ella ils avantatgs e dischavantatgs ch'i vala d'observar, sch'ins surpiglia incumbensas d'assistenza.

A partir da cura discurran ins da persunas che assistan lur confamigliars?

Persunas che assistan e tgiran lur confamigliars pon esser persunas da la famiglia d'ina persuna che basegna tgira, però er amias ed amis, enconuschentas ed enconuschents sco er vischinas e vischins. La persuna che basegna tgira na sto betg exnum esser ina persuna parenta. Il grad da parentella cun l'assistenta u l'assistent daventa relevant, mo en connex cun il dretg da survegnir bunificaziuns da tgira u in congedi da tgira. En quest connex valan sco persunas parentas geniturs, uffants, fragliuns e tats, sco er conjugals, sirs ed uffants figliasters.

Per regla surpiglian ils confamigliars la funcziun da la "direcziun da la tgira" a chasa. Ultra da las atgnas activitads d'assistenza e da tgira coordineschan ed organiseschan els la tgira e l'assistenza professiunala tras instituziuns u persunas spezialisadas, sco p.ex. la spitex.

Ina persuna che assista e tgira ses confamigliar na sto betg obligatoricamain esser al lieu. Persunas parentas che n'èn betg al lieu (numnadas er "distance care givers") pon surpigliar incumbensas coordinativas ed administrativas e surdar la tgira e l'assistenza a persunas spezialisadas. In instrument util per coordinar l'agid a distanza chattais Vus qua:

Ein hilfreiches Tool für die Koordination der Hilfe aus der Ferne finden Sie hier.

Tge chapeschan ins sut "persuna che basegna tgira"?

"Persunas che basegnan tgira" èn persunas attempadas e malsaunas sco er persunas cun impediments spiertals, corporals u psichics en tut las fasas da la vita.
Sut la noziun "persunas tgiradas" chapescha la Confederaziun: (Guardar er: Situationsanalyse und Handlungsbedarf für die Schweiz, pagina 9ss)

• Uffants ch'èn – fin ch'els han cumplenì il 18. onn da vita – fermamain malsauns u grevamain impedids ubain che suffran da las consequenzas d'in grev accident.
• Persunas creschidas ch'èn ablas da lavurar e che daventan andetgamain ferm malsaunas (p.ex. cancer) u che basegnan – pervia da la malsogna – ina tgira pli e pli intensiva (p.ex. sclerosa multipla).
• Persunas creschidas ch'èn pli attempadas e che – pervia d'ina greva malsogna u pervia da las maldispostadads da vegliadetgna – èn uschè restrenschidas en las activitads da lur vita quotidiana, ch'ellas ston survegnir in sustegn per viver independentamain a chasa
• Uffants e persunas creschidas cun malsognas raras. Las gruppas da persunas menziunadas qua survart pon survegnir – pervia da la raritad d'ina malsogna – ulteriuras chargias che pertutgan tant la persuna malsauna sco er ils confamigliars. Latiers tutga l'access ad infurmaziuns davart la malsogna, las pussaivladads da far diever da servetschs medicinals e l'access a medias e medis qualifitgads correspundentamain. Independentamain da la vegliadetgna èn pertutgadas per onn approximativamain 6000 fin 8000 pazientas e pazients da malsognas raras.
• Persunas minorennas e creschidas dependentas d'agid che vegnan sustegnidas da l'assicuranza d'invaliditad. Tenor l'artitgel 9 da la Lescha federala davart la part generala dal dretg d'assicuranza sociala (CS 830.1) vala ina persuna sco dependenta d'agid, sch'ella ha restricziuns da la sanadad e dovra perquai agid permanent da terzas persunas u surveglianza persunala per liquidar las incumbensas quotidianas.
  
  

Tge incumbensas surpiglian persunas che assistan lur confamigliars?

Persunas che assistan e tgiran lur confamigliars sustegnan las persunas che basegnan tgira particularmain en las suandantas activitads:

• autoprovediment e tgira (sustegn tar l'igiena dal corp, tar l'obligaziun da prender medicaments e/u cun metter en posiziun e mobilisar)
  
•  activitads administrativas e coordinativas (p.ex. decleraziun da taglia, quints, viadis per liquidar chaussas administrativas, coordinaziun da la tgira e dals servetschs da sustegn)
• tegnairchasa (preparar ils pasts, far la laschiva, nettegiar e.u.v.)
• mobilitad (garantir la mobilitad en l'abitaziun, accumpagnar a termins, servetschs da transport e.u.v.)
• temp liber – cunter l'isolaziun (coordinar las visitas, participar ad occurrenzas da moviment e d'inscunter u ad occurrenzas culturalas)
  

Tge ponderaziuns duessas Vus far, avant che surpigliar ina incumbensa d'assistenza?

Sch'in confamigliar basegna assistenza u tgira, resultan bleras dumondas:

•  Hai jau temp avunda per l'assistenza e la tgira?
• Tge ma motivescha da surpigliar l'assistenza?
• Tgi surpiglia ils custs? Co è mia situaziun finanziala?
• Tge capita, en cas d'ina perdita da salari u en cas d'ina perdita da las contribuziuns da l'assicuranza sociala?
• Co influenzescha l'incumbensa mia vita? Nua èn mes cunfins?
• Tge sustegn e tge distgargias datti e vi jau trair a niz quels?
• Tgi surpiglia mias incumbensas, sche jau sun absenta u absent?
• È la collocaziun en ina chasa da dimora in'opziun, u schizunt pli raschunaivla? 
  

La decisiun da prestar assistenza a chasa n'è betg simpla. Discurri cun la persuna che basegna tgira, cun ils confamigliars e cun autras persunas participadas. Scleri, tge sustegn ch'è necessari, tge ch'i vegn spetgà da Vus, però er, tge che Vus sezza u sez vulais e pudais prestar. Tras il barat cun las differentas persunas ed organisaziuns survegnis Vus ultra da quai cussegls utils e pratics che pon As facilitar la tgira e l'assistenza.

Motivs pussaivels u motivaziun

Da princip èn ils motivs u la motivaziun per surpigliar la tgira e l'assistenza fitg individuals. Ultra da l'obligaziun, da las aspectativas socialas e da la situaziun finanziala, èn ils motivs principals il pli savens la charezza per la persuna ed il basegn "da vulair dar enavos insatge". Blers confamigliars na vesan l'assistenza en emprima lingia betg sco chargia, mabain sco activitad raschunaivla e natirala.

E tuttina: questa activitad po daventar a lunga vista ina chargia. Igl è impurtant da sa fatschentar cun ils motivs e cun la motivaziun da l'incumbensa d'assistenza – a favur da l'atgna sanadad. Tgi che surpiglia incumbensas d'assistenza, perquai ch'i vegn spetgà quai dad ella u dad el, u perquai ch'ella u el vul spargnar daners, è svelt a fin cun sias forzas. En il mender cas pon il lung temp impundì u er il sentiment da bandunar sa sez far daventar malsauna la persuna che assista e tgira ses confamigliar. Er la reducziun u schizunt l'abandun da l'activitad da gudogn duess vegnir ponderà bain. Pensai a lunga vista, er per Vus sezza u sez. Ultra da la perdita dal salari sa tracti er da largias en l'assicuranza per vegls e survivents (AVS). As prendai pia temp ed As laschai cussegliar. E discutai cun Vossa patruna u Voss patrun davart pussaivladads.

Qua sutvart chattais Vus intgins aspects per e cunter, che Vus stuais ponderar avant che surpigliar incumbensas d'assistenza:

Facturs positivs

• la persuna che tgira ed assista è adina la medema ed è ina persuna da confidenza
• las confamigliaras ed ils confamigliars enconuschan la situaziun individuala da la persuna assistida nagina dependenza da terzas persunas
  
• vias da decisiun curtas
• pli grond dretg da cundecisiun
• pli gronda independenza
• sfera privata resta
• respargn da custs, perquai che l'assistenza tras persunas estras croda davent u perquai ch'ils custs da la chasa da dimora pon vegnir spargnads
  

Facturs negativs

• pon engrevgiar corporalmain, emoziunalmain e psichicamain – la ristga per malsognas che vegnan chaschunadas dal stress s'augmentan tar l'assistenta u l'assistent
• savens manca la stima e la renconuschientscha
  
• bler temp impundì
• perditas finanzialas sco er largias tar ils daners da las cassas da pensiun e tar la renta, sch'ins banduna la professiun 
  

Quest instrument util As gida a prender la decisiun: Glista da controlla agid da decisiun

Renviaments a la litteratura

Cudesch «Pflegend begleiten»
In mussavia per confamigliars e per amias ed amis da persunas che basegnan tgira. El cuntegna blers cussegls pratics, infurmaziuns ed adressas, las persunas pertutgadas, las persunas che tgiran lur confamigliars ubain las persunas da referenza che faciliteschan il mintgadi.

DVD «Zwischen Wunsch und Verpflichtung»
Il film mussa, co che confamigliars concepeschan il mintgadi e la convivenza e tge agid e sustegn ch'els dovran per mantegnair lur forzas fisicas e psichicas. A pled vegnan persunas pertutgadas che discurran avertamain davart lur sentiments, davart lur quitads, davart lur miserias e davart lur plaschairs quotidians.

"Entlastung für die Seele" - In mussavia per persunas che tgiran lur confamigliars
Tgi che surpiglia la tgira d'in confamigliar, sutvalitescha savens las chargias psichicas che pon esser colliadas cun quai. Il mussavia descriva ils problems tipics che pon resultar dal mintgadi da tgira, e mussa vias preventivas e distgargiantas. El fa curaschi da far diever d'agid d'ordaifer e dat ina survista da las purschidas da sustegn concretas. La publicaziun è vegnida concepida en collavuraziun cun l'associaziun da las psicoterapeutas e dals psicoterapeuts da la Germania.

Manual "Angehörige betreuen und pflegen"
La tgira po mo ir bain, sch'i va bain a las tgirunzas ed als tgirunzs sezs. Quest fatg prenda la Pro senectute dal Grischun serius e metta en il center dal manual las persunas che assistan e tgiran lur confamigliars.