Sanadad psichica
Da pudair satisfar las pretensiuns quotidianas è ina premissa impurtanta per il bainstar psichic. Cun vegnir pli vegl sa midan il corp, la psica, l'atgna rolla en la societad e l'ambient social e pia er la sfidas en il mintgadi.
Sche nus ans muvain regularmain, sche nus mangiain en moda equilibrada e sche nus ans recreain en il sien, faschain nus gia bler per nossa sanadad. I vala dentant la paina da rinforzar sistematicamain nossa psica, per dumagnar las chargias cun vegnir pli vegl e per pudair acceptar ils novs cunfins fisics. As laschai inspirar dals impuls per rinforzar la sanadad psichica:
- participar (p.ex. engaschament voluntar u commembranza en in'uniun)
- emprender chaussas novas
- far chaussas creativas (p.ex. chantar, picturar, reparar, cuser, furmar)
- acceptar sasez
- avair fidanza en sasez
- discurrer da plaschairs e da displaschairs
- restar en contact cun amis e cun la famiglia
Isolaziun n'è betg in tabu
En tscherts muments essan nus gugent sulets ed ans sentin bain uschia. Sche l'esser sulet è però nunvoluntar ed è collià cun sentiments dischagreabels, alura discurran ins d'isolaziun. Il sentiment da betg far part u da betg pli vegnir duvrà, po tutgar mintga persuna. Savens passan tals muments puspè. Sche nus ans sentin però duraivlamain isolads, po quai far donn a nossa sanadad psichica e fisica. Per persunas externas èsi savens strusch pussaivel da vesair, sch'insatgi è isolà. Tant pli impurtant èsi, che Vus prevegnias u reduceschias activamain l'isolaziun:
- Discurri da quai che As fatschenta. Vus n'essas betg la suletta persuna cun quest sentiment. Da discurrer da quai po crear ina colliaziun.
- Datti ina persuna che As po gidar a chattar novs contacts? Cumenzai in discurs cun questa persuna.
- Daventai sez activ, empruvai insatge nov. Restai vidlonder, er sch'i na funcziuna betg a l'emprima emprova.
- Giai en il liber, il moviment e la natira fan bain.
- Envidai glieud tar Vus, saja quai er mo per in café e per in pèr biscuits. N'As laschai betg scuraschar d'ina resposta negativa.
Acceptar agid
Sche las grevezzas psichicas duran pli ditg e sche discurs cun la famiglia u cun il ravugl d'amis na gidan betg vinavant, èsi impurtant da dumandar in agid professiunal. S'adressai p.ex. a Voss medi da chasa, sche Vus As sentis durant ditg deprimì u senza energia, sche Vus suffris da disturbis dal sien u sche Vus perdais l'appetit. Quests disturbis pon ins tractar bain. Faschai perquai stim d'eventuals signals d'avertiment e laschai gidar en cas da basegn Vus sez u Voss confamigliars pertutgads.
Purschidas interessantas