Plazzas da giugar per scolas e vischnancas che promovan il moviment

Plazzas da giugar bain concepidas promovan il svilup motoric, emoziunal, cognitiv e social d'uffants e da giuvenils – e rinforzan uschia lur sanadad e lur bainstar. Il Post spezialisà per la promoziun da la sanadad sustegna scolas, scolinas e vischnancas en il Grischun da planisar e da realisar en moda participativa plazzas da giugar natiralas che promovan il moviment. Ultra d'ina participaziun finanziala accumpagnain nus l'entir process en moda professiunala ed organisatorica.

Gruppa/s en mira

Vischnancas, scolinas e scolas

Finamiras dal project

Crear plazzas da giugar attractivas che promovan il moviment, e quai cun ina cussegliaziun professiunala e cun in accumpagnament dal process.

Promover il svilup cumplessiv dals uffants e dals giuvenils tras plazzas da giugar che correspundan als basegns.

Evitar planisaziuns sbagliadas, rinforzar l'identificaziun cun la plazza da giugar e reducir il vandalissem tras ina participaziun activa.

Cuntegns da la purschida

• Cussegliaziun professiunala ed accumpagnament tras persunas spezialisadas cun experientscha
• Sesida iniziala cun gruppa da lavur
• Sustegn en connex cun la realisaziun e l'evaluaziun da process participativs
• Inspecziun al lieu ed elavuraziun da skizzas conceptualas incl. preventiv, discussiun ed adattaziun
• Direcziun da construcziun concepziunala cun partenaris da realisaziun locals
• Svilup d'in concept per la tgira da la plazza da giugar e tips per ina tgira persistenta

Cundiziuns generalas

• Avair ina voluntad politica da realisar (en moda participativa, natirala, che promova il moviment)
• Integrar activamain las scolaras ed ils scolars en il process da planisaziun (p.ex. tras workshops u tras enquistas
• Definir in team da project intern
• Far scleriments preliminars en connex cun il preventiv e la permissiun da construcziun
• Far in preventiv per in mantegniment a lunga vista
• La plazza da giugar sto esser accessibla a la publicitad