Rinforzar la sanadad psichica e las cumpetenzas da viver dals giuvenils

Il Post spezialisà per la promoziun da la sanadad realisescha il project da pilot per rinforzar la sanadad psichica e las cumpetenzas da viver dals giuvenils en il Grischun ils onns 2024 fin 2025. Quai en cooperaziun cun la Federaziun tetgala da la promoziun d'uffants e da giuvenils dal Grischun (jugend.gr).

Il project cuntegna dus plauns da realisaziun:

Plaun communal

En trais fin tschintg vischnancas da pilot vegnan furmadas gruppas da project. Ellas vegnan manadas d'ina coordinaziun communala dal project e sa cumponan da represchentanzas da persunas da referiment en las famiglias, da persunas da l'ambient social dals giuvenils sco er da las instanzas da decisiun sin plaun communal. En in process participativ che vegn accumpagnà da la direcziun chantunala dal project, vegnan fixadas, planisadas e realisadas las mesiras. Las mesiras s'orienteschan a las pretensiuns ed als basegns communals. Las vischnancas participadas duessan:

• avair structuras che promovan la giuventetgna
• tematisar la cumpetenza digitala en chaussas da la sanadad (netpatia)
• sa participar a l'inscunter regiunal d'infurmaziun e da colliaziun
• examinar material d'infurmaziun (campagna «Co vai cun tai?», valisch da metodas da la purschida «E cun tai?» e.u.v.)

Plaun da las scolas da furmaziun generala, da las scolas professiunalas e dals manaschis d'emprendissadi

Suenter il temp da scola obligatoric sa schlargia il center da la vita da las persunas giuvnas creschidas (da 16 fin 20 onns). Ellas sa decidan per ina furmaziun professiunala u per ina scola da furmaziun generala. Questa midada po esser pretensiusa per ils giuvenils. Or da quest ambient extendì vegnan eruidas collavuraturas e collavuraturs – ed i vegnan identifitgads lur basegns, che rinforzan lur cumpetenzas en connex cun il tema da la sanadad psichica da las persunas giuvnas creschidas. Il material correspundent da purschiders naziunals e chantunals existents vegn rimnà, preparà e rendì accessibel a las acturas ed als acturs.

Gruppas en mira

Gruppa en mira primara

• Geniturs / persunas responsablas per l'educaziun, parentas e parents – persunas da referiment en las famiglias
• Persunas che lavuran cun giuvenils, lavureras e lavurers socials da scola, manadras e manaders d'uniuns – persunas da l'ambient social
• Instanzas da decisiun sin plaun communal, collavuraturas e collavuraturs da las scolas da furmaziun generala / da la furmaziun professiunala – ambient public

Gruppa en mira secundara

• Giuvenils (da 10 fin 15 onns) sin plaun communal en il sectur dal temp liber
• Persunas giuvnas creschidas (da 16 fin 20 onns) che frequentan scolas da furmaziun generala, scolas professiunalas e manaschis d'emprendissadi

Finamiras dal project

Las persunas da referiment en las famiglias, las persunas da l'ambient social dals giuvenils sco er las instanzas da decisiun sin plaun communal augmentan lur chapientscha e lur attenziun per il tema da la sanadad psichica e da las cumpetenzas da viver dals giuvenils. Lur cumpetenzas vegnan rinforzadas.

En in process participativ elavuran las gruppas da project communalas in plan da mesiras. Las collavuraturas ed ils collavuraturs da las scolas da furmaziun generala, da las scolas professiunalas e dals manaschis d'emprendissadi en il chantun Grischun utiliseschan material d'infurmaziun per rinforzar la sanadad psichica da las persunas giuvnas creschidas.

Realisaziun

Plaun communal

• Acquisiziun da las vischnancas da pilot (publicaziun l'atun 2024)
• Elavuraziun participativa dal plan da realisaziun per mesiras en las vischnancas da pilot (schaner – avrigl 2025)
• Planisaziun e realisaziun da las mesiras en las vischnancas da pilot (avrigl – december 2025)
• Evaluaziun dals process en las vischnancas da pilot (december – favrer 2026)

E Plaun da las scolas da furmaziun generala, da las scolas professiunalas e dals manaschis d'emprendissadi

• Identifitgar las collavuraturas ed ils collavuraturs ed alura eruir ils basegns (2025)
• Preparar e distribuir material d'infurmaziun correspundent per las collavuraturas ed ils collavuraturs da las scolas da la furmaziun generala, da las scolas professiunalas e dals manaschis d'emprendissadi (2025)