Rinforzar la scola tras sanadad psichica
MindMatters è in program accumpagnà scientificamain ed experimentà en la pratica per promover la sanadad psichica en tut ils ciclus (er en las purschidas transitoricas). Cun ils moduls – che pon vegnir applitgads en l'instrucziun – per l'accumpagnament e per il svilup da l'instrucziun e da la scola, sustegna MindMatters las scolas da promover il bainstar e la sanadad psichica da las scolaras e dals scolars, sco er d'ulteriuras persunas participadas a la scola.
La fasa da project dura 1.5 fin 2 onns e vegn realisada en moda flexibla tenor il basegn e tenor l'organisaziun da la scola. MindMatters sa basa sin il concept da la «Scola che promova la sanadad» ed integrescha l'entira scola.
Gruppa/s en mira
Direcziuns da scola, persunas d'instrucziun, lavur sociala da scola e pedagogia curativa da scola
Finamiras dal project
Il persunal da scola è sensibilisà per il tema sanadad psichica e sviluppa las enconuschientschas persunalas sco er las atgnas cumpetenzas d'agir.
La sanadad psichica e las cundiziuns d'emprender da las scolaras e dals scolars sa midan en moda positiva.
La scola sco organisaziun franchescha a lunga vista mesiras per promover la sanadad psichica en il mintgadi da scola.
MindMatters effectuescha ina cultura da scola che promova la sanadad. Tut las commembras e tut ils commembers da la scola sa sentan segirs, appreziads ed integrads. La scola daventa pli e pli in lieu, nua che tuttas e tuts èn gugent.
Cuntegns da la purschida
- Intermediaziun d'ina persuna da cussegliaziun
- Dus mezs dis da furmaziun supplementara cun il collegi/cun la gruppa da lavur
- Sustegn finanzial: Il Post spezialisà per la promoziun da la sanadad sustegna finanzialmain las scolas cun ina contribuziun unica da maximalmain 3000 francs per l'accumpagnament dal process.
- Dus exemplars stampads dal modul da basa correspundent (per lieu) incl. access a la versiun PDF
- Access a furmaziuns supplementaras cun connex tematic (p.ex. sur la SAPGR)
- Newsletter «Promoziun da la sanadad en scola»
- Commembranza a la rait da scolas21 grischun
Cundiziuns generalas
- Furmaziun d'ina gruppa da project e nominaziun d'ina persuna incumbensada da la scola per «MindMatters»
- Collavuraziun activa da las commembras e dals commembers da la gruppa da project
- Ina maioritad da las commembras e dals commembers da la scola declera da s'engaschar per ch'il project reusseschia (integrar ils exercizis en l'instrucziun, sa barattar regularmain davart l'implementaziun en las structuras existentas, e.u.v.) e da francar mesiras en il mintgadi da scola.
- La direcziun da scola sustegna il project cun resursas finanzialas e persunalas
- Intenziun da francar il project a lunga vista
- Commembranza en la rait da scolas21 grischun
Links