La scola agescha – prevenziun da stress al lieu da lavur
Promoziun da la sanadad en las scolas
La purschida è in process da svilup da la scola cumplessiv ch'è sa cumprovà en la pratica e ch'è vegnì evaluà. Ella vul rinforzar la sanadad da tut las collavuraturas e da tut ils collavuraturs d'ina scola.
Cun agid d'ina retschertga online cumplessiva (Job-Stress-Analysis) vegnan determinadas las resursas, las grevezzas ed il bainstar general da las collavuraturas e dals collavuraturs sin il stgalim da la scola e dal team. Sin basa da questa analisa da la situaziun eruescha il team da scola communablamain il potenzial da svilup, definescha champs d'acziun, concepescha mesiras individualas per rinforzar la sanadad e planisescha lur realisaziun.
Durant l'entir process da realisaziun vegn la scola accumpagnada d'ina persuna da cussegliaziun accreditada.
Gruppa/s en mira
Direcziuns da scola ed autoritads da scola
Finamiras dal project
La sanadad da las collavuraturas e dals collavuraturs en ina scola vegn rinforzada tras mesiras individualas e cun cleras finamiras.
Direcziuns da scolas, persunas d'instrucziun sco er ulteriuras collavuraturas e collavuraturs d'ina scola ageschan en moda professiunala ed èn conscientas e conscients da lur sanadad corporala e psichica. Uschia influenzeschan els en moda positiva il clima da scola e la qualitad da l'instrucziun. Da quai profitan en spezial las scolaras ed ils scolars (motivaziun d'emprender augmentada e success da furmaziun).
Cuntegns da la purschida
- Intermediaziun da la persuna da cussegliaziun accreditada
- Sustegn finanzial: Il Post spezialisà per la promoziun da la sanadad sustegna las scolas finanzialmain cun ina contribuziun unica da 2000 francs per la cussegliaziun/l'accumpagnament dal process (incl. enquista).
- Access a furmaziuns supplementaras cun connex tematic (p.ex. sur la SAPGR)
- • Newsletter «Promoziun da la sanadad en scola»
Scolas commembras da la rait da scolas21 grischun profitan da contribuziuns finanzialas supplementaras.
Cundiziuns generalas
- Avertadad da la direcziun da scola per in process participativ
- Prontezza da cooperar da las collavuraturas e dals collavuraturs
- Planisaziun realistica dal project sur 1–2 onns
- Resursas da temp (direcziun dal project entaifer la scola, almain 5–6 contacts/sesidas cun persuna da cussegliaziun, 30–45 minutas per in'enquista online per mintga collavuratura u collavuratur e.u.v.)
- Resursas finanzialas: 6000 fin 8000 francs (minus la contribuziun da sustegn dal Post spezialisà per la promoziun da la sanadad)
- Examinaziun da la participaziun a la rait da scolas21
Links