Incumbensa

Il Post spezialisà per la promoziun da la sanadad è ina partiziun dell'Ufficio dell'igiene pubblica dei Grigioni.

L'incumbensa dal Post spezialisà per la promoziun da la sanadad è descritta en la Lescha da sanadad e cumpiglia – en il sectur da la promoziun da la sanadad e da la prevenziun – las suandantas cumpetenzas:

• campagnas e programs en tut il chantun
• incumbensas intercommunalas
• sustegn spezialisà a las vischnancas
• coordinaziun da las activitads da las vischnancas
• cussegliaziun gratuita a mammas e babs, respectivamain a persunas responsablas per l'educaziun, en dumondas da la tgira da poppins e d'uffants pitschens

Lavurs

En il chantun Grischun è il Post spezialisà per la promoziun da la sanadad il center da cumpetenza pertutgant la promoziun da la sanadad e la prevenziun. La visiun da la promoziun da la sanadad è:

«Tut ils umans en il Grischun surpiglian lur atgna responsabladad, uschenavant che quai è pussaivel per els, ed han in stil da viver saun. Posts chantunals, vischnancas, scolas, patrunas e patruns s'engaschan da concepir cundiziuns da viver e da lavurar che promovan la sanadad.»

Sco resumaziun stattan las suandantas activitads en il center:

• Nus elavurain e realisain programs chantunals e campagnas per promover il moviment ed in nutriment saun, per rinforzar la sanadad psichica e la prevenziun da dependenzas.
• Cun differentas purschidas che cumpiglian la prevenziun e la promoziun da la sanadad sustegnain e cussegliain nus scolas, vischnancas, instituziuns, posts spezialisads, uniuns e persunas singulas.
• En collavuraziun cun organisaziuns spezialisadas dal chantun garantin nus la cussegliaziun e l'accumpagnament da geniturs cun uffants a partir da la naschientscha fin il 5. onn da l'uffant.
• Nus essan responsabels per realisar incumbensas legalas da la Confederaziun e dal chantun. Latiers tutgan per exempel la realisaziun da la tgira da dents en scola ensemen cun las vischnancas e cun la Societad grischuna da dentists, la gestiun d'in Post da cussegliaziun cunter malsognas transmissiblas sexualmain cun l'Agid grischun cunter AIDS, sco er la lavur vi dals puncts centrals da svilup dal program da la Regenza.

Il Post spezialisà per la promoziun da la sanadad lavura vi dals suandants temas:

• Promoziun da la sanadad d'uffants e da giuvenils (program)
• Promoziun da la sanadad en la vegliadetgna (program)
• Prevenziun da dependenzas (program)
• Coordinaziun da la Cussegliaziun da geniturs dal Grischun
• Persunas che assistan e tgiran lur confamigliars (plan d'acziun)
• Promoziun da la sanadad en vischnancas
• Promoziun da la sanadad en scolas