Statisticamain survegn mintga segunda persuna en il Grischun en il decurs da sia vita ina malsogna psichica seriusa.
Malsognas psichicas vegnan tabuisadas, condemnadas e zuppadas memia savens. Nus na dastgain e na savain betg ans prestar da negliger nossa sanadad psichica, perquai che senza quella na datti nagina sanadad.
In persuna sa senta psichicamain sauna, sch’ella ha la pussaivladad da nizzegiar sias abilitads mentalas ed emoziunalas, da dumagnar ils engrevgiaments da la vita quotidiana, da lavurar da maniera productiva e da dar ina contribuziun a la cuminanza. (WHO/OMS, 2003)
La sanadad psichica è cumplexa ed ina sfida durant l’entira vita. Disposiziuns ed experientschas persunalas, l’ambient social, la societad, dentant era cundiziuns da l’ambient e da lavur giogan ina rolla. Relaziuns da confidenza cun noss conumans ed in clima da fiduzia, stima e fairness – saja quai a la plazza da lavur u en famiglia – èn impurtants. Els promovan nossa atgna sanadad psichica e quella da noss conumans. In «co vai cun tai» simpel, sincer ed interessà è in emprim bun pass. Prendai il temp per tadlar e raquintar.
Sanadad psichica en la famiglia
La sanadad psichica e malsognas psichicas pertutgan las famiglias en maniera multifara. D’ina vart vegnan messas durant l’uffanza fundaments impurtants per il svilup psichic. Da l’autra vart è pertutgada l’entira famiglia, sch’in commember survegn ina malsogna psichica.
Set films curts davart il tema «Disturbi psichic dals geniturs – tge far?» (Institut Kinderseele Schweiz, tudestg)
La broschura «Sanadad psichica e malsognas en la famiglial cuntegna impuls per geniturs e persunas da referiment (tudestg)
Sanadad psichica a la plazza da lavur
“E tge faschais Vus da professiun?” Ina dumonda che vegn fatga spert, sche umans s’entaupan. La lavur è ina part da nossa identitad. Ins sa che la lavur ha per regla in’influenza positiva per la sanadad psichica. La lavur sa dentant era esser in engrevgiament e far vegnir malsaun en il mender cas.
Las broschuras cuntegnan infurmaziuns fundadas preziusas tar il tema lavur e psica. Ellas cuntegnan tips per lavurantas e lavurants resp. persunas da cader per la prevenziun da malsognas psichicas. Ultra da quai preschentan ellas pussaivladads d’agir, sche collavuratur(a)s èn sut squitsch psichic u daventan malsauns.
Problems psichics cuvran la vaira fatscha – in manual per persunas da cader (IAS Grischun, tudestg)
Sanadad psichica a la plazza da lavur per lavurantas e lavurants (tudestg)
Sanadad psichica a la plazza da lavur – in mussavia per persunas da cader (tudestg)
Turnar en in job saun e cun success
In return en la professiun suenter ina inabilitad da lavurar pli lunga ha mo success, sche tut las persunas pertutgadas lavuran ensemen. Cun quest intent èn sa reunidas federaziuns dals patruns dal Grischun, assicuranzas socialas, represchentanzas dal sistem da sanadad e dals sindicats a la rait reWork .
Malsognas psichicas
Malsognas psichicas èn frequentas. Precis sco malsognas corporalas fan las malsognas psichicas part da la vita e pon pertutgar tuttas e tuts. Mintga segunda persuna en Svizra patescha en il decurs da sia vita ina giada d’ina malsogna psichica seriusa. Disturbis da la tema e depressiuns fan part da las malsognas las pli frequentas.
Malsognas psichicas han motivs cumplexs, san per regla dentant vegnir tractadas bain ed èn savens era guariblas. Tar blers umans sa manifesta ina malsogna mo ina giada en la vita. Explicaziuns davart las differentas malsognas chattais Vus qua Servetsch psichiatrics dal Grischun.