Ils programs e projects en il sectur da la promoziun da la sanadad e da la prevenziun sustegnids da l’Uffizi da sanadad han las suandantas finamiras:

• Francar il moviment ed il nutriment saun en il mintgadi da scola
• Rinforzar las resursas e cumpetenzas da viver da tut las persunas participadas en scola
• Intermediar savida davart substanzas da dependenza e cumportament da risico en il rom da la prevenziun da dependenza 

Uschia duain vegnir elavuradas cundiziuns da basa che promovan ina vita sauna tant  sin il nivel corporal, psichic ed era social.

Contribuziuns a projects

L’Uffizi da sanadad sustegna scolas tar la realisaziun da programs che promovan la sanadad e che han in concept che pertutga l’entira scola. El intermediescha persunas spezialisadas e renviescha a materialias d’instrucziun praticas ed inspirantas. Las scolas survegnan era sustegn finanzial tar projects concepids da maniera individuala cun ina dumonda per ina contribuziun al project. 

Maisa da mezdi premiada

Tar la purschida da cussegliaziun “Maisa da mezdi premiada” stat en il center in nutriment saun, equilibrà e varià per uffants e giuvenils. En collavuraziun cun la cussegliadra da nutriment profiteschan maisas da mezdi e structuras dal di interessadas  d’ina cussegliaziun extendida e survegnan ina scolaziun per collavuratur(a)s. L’accumpagnament da la cussegliadra da nutriment dura radund in onn, tut tenor il manaschi, e vegn terminada cun in certificat.

Cussegliaziun per la concepziun da la plazza da pausa

L’Uffizi da sanadad porscha sustegn tar l’optimaziun da las plazzas da pausa da scolas e scolinas dal Grischun. Persunas spezialisadas visitan la scola, valiteschan las plazzas da gieu e da pausa e fan propostas per ina concepziun optimala.

Film “La dretga plazza da pausa” – en tschintg pass tar in conturn da scola favuraivel al moviment e damanaivel a la natira. 

Spazi d’aventuras enstagl d’urdains da giugar

Uffants passentan bler temp sin plazzas da gieus, implants al liber dad instituziuns da tgira u sin l’areal da scola. Saja quai cun tgira, durant il temp liber, avant u suenter l’instrucziun u durant la pausa. Impurtant èsi ch’ils uffants hajan a disposiziun spazis d’emprender e d’experientschas adattads, nua ch’els sa sentan bain e nua ch’els san acquistar cumpetenzas.

In conturn modern

Displaschaivlamain na satisfan bleras plazzas da gieu da las vischnancas u plazzas da pausa da scolas e scolinas betg als basegns d’in conturn d’emprender stimulant. Ellas na porschan betg in conturn per gieus captivants u per in temp da recreaziun luc.

Commitment per la concepziun d’ina plazza da pausa
Glista da controlla per la concepziun d’ina plazza da pausa

Scola en moviment

Dapi il 2008 s’engascha il chantun Grischun per la promoziun dal moviment ed ina cultura da mangiar sauna en il mintgadi da scola. Cun “Scola en moviment” survegnan ils uffants avunda spazi per viver lur basegn da moviment natiral, per rimnar experientschas da moviment positivas e per sa nutrir da maniera equilibrada e quai era ordaifer l’instrucziun da sport u dals dis da sport obligatorics. Moviment è in element essenzial  d’ina cultura da scola sauna e promova la concentraziun, la sanadad e la prestaziun. Il project “Scola en moviment” è in pachet da mesiras cumplessiv che integrescha in’entira scola: las autoritads da scola, l’entir team da persunas d’instrucziun, tut las scolaras ed ils scolars, ils geniturs ed il servetsch tecnic.

MindMatters – rinforzar la scola tras sanadad psichica

MindMatters è in program cumprovà e scientificamain fundà per rinforzar intenziunadamain las cumpetenzas social-emoziunalas da scolaras e scolars en ils ciclus 1-3 sco era tar il passadi a la scolaziun ed a la professiun.

MindMatters sa basa sin il concept da la “scola che promova la sanadad” e sin il concept dal setting, includa pia l’entira scola. Cun ils moduls applitgabels en l’instrucziun dals roms, entschaivi directamain tar l’incumbensa da furmaziun e gida uschia a las scolas da promover il bainstar e la sanadad psichica da scolaras e scolars e da las persunas d’instrucziun. È il svilup d’ina cultura da scola nua che tut ils commembers e las commembras da la scola sa sentan segirs, stimads ed involvids impurtanta per Vus? La scola sco lieu nua ch’ins è gugent, quai vulais Vus cuntanscher?

L’Uffizi da sanadad è responsabel en collavuraziun cun la SAP dal Grischun per l’introducziun da MindMatters en scolas grischunas. Scolas participantas survegnan ina scolaziun per emprender d’enconuscher ils moduls, ellas s’occupan cun concepts per la promoziun da la sanadad psichica e sviluppan emprimas mesiras per la realisaziun en il mintgadi da scola.

Ulteriuras infurmaziuns davart il program da MindMatters chattais Vus sin www.mindmatters.ch

Scolina cupitgarola

Cun meds simpels e damanaivels a la pratica procura Cupitgarola en l’entira Svizra per dapli moviment e nutriment saun en scolina. Domadus elements èn centrals per il svilup saun da corp ed olma.
Partenari da realisaziun per Cupitgarola en il chantun Grischun è Grischun-Sport.

La scola agescha – prevenziun da stress a la plazza da lavur

Il clima da scola e la qualitad da l’instrucziun stattan en stretga relaziun cun il bainstar psichic da las persunas d’instrucziun e da las direcziuns da scola. “La scola agescha” è in process da svilup da la scola cumprovà en la pratica, evaluà e cumplessiv per il rinforzament da la sanadad da persunas d’instrucziun, da direcziuns da scola ed ulteriur(a)s collavuratur(a)s d’ina scola. L’Uffizi da sanadad dal Grischun intermediescha persunas da cussegliaziun accreditadas e sustegna scolas tar la realisaziun cun ina contribuziun. Infurmaziuns detagliadas davart il process survegnis Vus sin www.schule-handelt.ch 

GORILLA Toolbox

Cun differents workshops fascinescha GORILLA giuvenils per ils temas sports da Freestyle, nutriment e stil da viver persistent e promova uschia lur cumpetenzas da viver.  L’Uffizi da sanadad sustegna la realisaziun da workshops da GORILLA ed il perfecziunament per persunas d’instrucziun. Qua vai tar la purschida per scolas grischunas.