« enavos

Jau sun victima d'in cyberdelict. Tge poss jau far?

Annunziai in'eventuala transacziun (er sche Vus avais effectuà quella) immediatamain a Vossa banca e segirai uschè svelt sco pussaivel tut las cumprovas.

Faschai silsuenter ina denunzia penala al proxim center da polizia. Per las investigaziuns dovra la polizia da princip las suandantas indicaziuns:

• Segirar infurmaziuns davart las delinquentas ed ils delinquents (p.ex. profil en las medias socialas, inserat fraudulent, pagina d'internet, link) il meglier cun screenshot u cun PDF
• Copia da la correspundenza (p.ex. cronologia dal chat)
• E-mails originals
• Quittanza da pajament cun la data, cun l'import pajà e cun las indicaziuns da retschavider / nr. IBAN
• Banking online: mussament sco PDF cun il nr. IBAN e cun il num da la retschavidra u dal retschavider sco er import pajà e data
• Carta da credit: numer da l'atgna carta da credit sco er PDF u fotografia cun il num da la retschavidra u dal retschavider; import pajà e data
• TWINT: printscreen da moviments cun ils detagls respectivs sco import pajà, data ed uras sco er numer da telefon da la retschavidra u dal retschavider

Jau hai subì in donn finanzial. Èn mes daners pers?

Ils blers cyberdelicts han motivs finanzials. Pli svelt che Vus purtais plant ed infurmais Vossa banca principala, e pli gronda è la schanza che transacziuns fraudulentas pon vegnir bloccadas. Suenter che Vus avais fatg ina denunzia penala tar la Polizia chantunala dal Grischun, survegnis Vus la pussaivladad d'annunziar Voss cas sin la plattafurma da CYBERA. CYBERA vegn ad empruvar da bloccar ils daners. Grazia al partenadi cun la Polizia chantunala dal Grischun è quest servetsch gratuit per Vus. I na dat dentant nagina garanzia ch'ils daners pon vegnir restituids.

Èsi probabel che las delinquentas ed ils delinquents stoppian star buns per ils malfatgs?

Faschai en mintga cas ina denunzia u annunziai almain il cas a la Polizia chantunala dal Grischun. Uschia pon vegnir rimnads indizis impurtants davart las gruppaziuns da delinquentas e delinquents sco er lur proceder.

Ha la Polizia chantunala dal Grischun cumpetenzas specificas en il cybersectur?

La Polizia chantunala dal Grischun dispona dapi l'onn 2017 d'in Servetsch da cybercriminalitad cun 13 collavuraturas e collavuraturs. Il Servetsch da cybercriminalitad investighescha en cas da criminalitad digitala. Il dumber da tals cas s'augmenta cuntinuadamain, perquai che engions tradiziunals vegnan spustads en l'internet. Tar questa criminalitad da massa tutgan tranter auter engions d'investiziun online. Plinavant èn las spezialistas ed ils spezialists er responsabels per cas cumplexs sco attatgas da ransomware u persecuziun da pedocriminalas e pedocriminals en l'internet.

Co poss jau contribuir a la cybersegirezza en il chantun Grischun?

JMintgina e mintgin po contribuir insatge a la cybersegirezza. Cun meds simpels, cun pauca lavur e cun resguardar mo tschintg pass pudais Vus meglierar considerablamain Vossa segirezza digitala. Observai las recumandaziuns sut "«Tips davart cybersegirezza»" e sensibilisai Voss conturn. Gidai a stgaffir ina cultura da segirezza.