« enavos

La Polizia chantunala dal Grischun dispona dapi l'onn 2017 d'in Servetsch da cybercriminalitad (SCYC) che cumpiglia 14 collavuraturas e collavuraturs e ch'è dividì en trais servetschs spezials:

Forensica digitala

La Forensica digitala s'occupa da la segirada e da l'extracziun da datas d'apparats mobils, da computers, da servers, dad IoT devices e da bler auter, uschia che questas datas pon vegnir duvradas davant dretgira.

Investigaziun da cybercriminalitad

Il servetsch spezial Investigaziun da cybercriminalitad maina atgnas proceduras d'investigaziun tar delicts cumplexs da criminalitad digitala e da cybercriminalitad. En quest sectur èn situadas ultra da quai l'analisa da malware, il reverse engineering, il tracing da criptomunaida, surveglianzas tecnicas, ma er investigaziuns en il darknet. Plinavant sustegnan las collavuraturas ed ils collavuraturs la polizia unifurmada tar l'investigaziun generala da criminalitad digitala e tar las investigaziuns da delicts convenziunals che han in connex cun datas digitalas.

Il cumbat da cyberdelicts pretenda collavuraturas e collavuraturs fitg qualifitgads. Tar il SCYC lavuran tant emploiadas civilas ed emploiads civils sco er polizistas e polizists cun scolaziuns spezialas en il sectur da l'informatica, da l'analisa da datas, da las relaziuns internaziunalas, da la criptoanalisa e da la cybersegirezza. Ultra da quai dispona il SCYC d'ina infrastructura specifica cun hardware e cun software speziala.

Post d'analisa criminala

Il Post d'analisa criminala è responsabel per l'analisa criminala operativa, tactica e strategica. Las collavuraturas ed ils collavuraturs èn spezialisads sin l'identificaziun da musters da delinquentas e delinquents. Ellas ed els contribueschan uschia al maletg da la situaziun. Quai tant entaifer il Grischun sco er en l'entira Svizra.

Nossa visiun

Cybercriminalas e cybercriminals na duain avair nagina schanza en il Grischun. Il chantun Grischun duai daventar in conturn nunprofitaivel cun cundiziuns pli difficilas per cybercriminalas e cybercriminals. Ultra da las investigaziuns sa deditgescha il Servetsch da cybercriminalitad perquai er al suandant:

• Sensibilisaziun da la populaziun cun contribuziuns en las medias socialas
• Promoziun globala ed interdisciplinara dal barat d'infurmaziuns cun partenarias e partenaris
• Defensiun preventiva da novas smanatschas
• Destrucziun da structuras cybercriminalas cun metodas innovativas
• Introducziun d'investigaziuns proactivas cunter pedocriminalas e pedocriminals

«Nus faschain il Grischun segir, er en il spazi virtual»