Infurmaziuns supplementaras per possessuras e possessurs d'armas davart la carta europeica d'armas da fieu per ir a l'exteriur

Armas e possess actual

Sch'ins vul prender cun sai a l'exteriur in'arma ch'ins na posseda betg sez, ston ins far ordavant in contract en scrit cun la possessura u il possessur da l'arma, resp. sto l'arma midar maun per la durada da la dimora a l'exteriur. Sche la dimora a l'exteriur dura dapli che 30 dis, sto la petenta u il petent agiuntar ina copia dal contract per l'arma correspundenta a la dumonda per ina carta europeica d'armas da fieu.

Supplement

Per in supplement en la carta europeica d'armas da fieu na dovri betg ina nova fotografia da passaport. In supplement po dentant vegnir inscrit exclusivamain durant la valaivladad da la carta.

Prolungaziun

En cas d'ina dumonda da prolungaziun na dovri betg pli in extract dal register penal ed i na ston er betg vegnir agiuntadas novas fotografias da passaport. La prolungaziun è dentant pussaivla exclusivamain durant la valaivladad da la carta.

Inscripziuns d'accessoris d'armas

Accessoris d'armas (per exempel surdinas) pon ins laschar inscriver en la carta europeica d'armas da fieu mo, sch'ins ha acquistà tals ordavant tras ina permissiun excepziunala. E quai è er mo pussaivel, sche la petenta u il petent è er possessura u possessur dals accessoris d'armas correspundents.

Infurmaziun generala

Tant per survegnir ina nova carta europeica d'armas da fieu, per laschar inscriver in supplement sco er per prolungar la carta ston ins inoltrar la dumonda uffiziala. Questa dumonda sto vegnir emplenida en moda correcta, cumpletta e bain legibla sco er vegnir suttascritta e tramessa cun tut las agiuntas necessarias, dentant senza extract dal register penal, a la Polizia chantunala. Las copias da las permissiuns excepziunalas ed ils contracts da las armas e dals accessoris d'armas che duain vegnir inscrits, ston medemamain vegnir agiuntads a la dumonda.

Dumonda per ina carta europeica d'armas da fieu

Contract en scrit

Dumondas/formulars per armas e muniziun

Trametter a

Polizia chantunala dal Grischun
Post spezialisà per armas
Ringstrasse 2
7000 Cuira

Per emplenir, elavurar ed arcunar ils formulars da PDF dovr'ins il Adobe Acrobat Reader che vegn mess a disposiziun gratuitamain. Quel pon ins chargiar giu directamain da la pagina d'internet dad Adobe (https://get.adobe.com/de/reader/). Senza quest tool n'èsi betg pussaivel d'emplenir ed arcunar il formular da PDF al PC u al Mac.