Diever da vehichels electrics da trend

Il boom da meds da traffic da trend cuntinuescha. I n'è betg da survesair, che las scolaras ed ils scolars en il chantun Grischun dovran sin lur via da scola ed en lur temp liber pli e pli er vehichels electrics da trend, saja quai e-bikes, e-trottis, e-scooters u auters. En quest connex constatain nus adina dapli fauss cumportaments che resultan savens d'ina mancanza da savida.

Per quests motivs vulain nus gugent As infurmar davart las prescripziuns las pli impurtantas:

• Tut ils vehichels electrics da trend dastgan vegnir duvrads pir a partir da 14 onns. Ultra da quai sto la persuna posseder il permiss da manischar da la categoria M (mopeds) u G (vehichels a motor agriculs e forestals). Persunas da 16 onns e pli veglias dovran in permiss da manischar da la categoria M u G mo per e-bikes svelts.
• Igl è scumandà da charrar cun vehichels electrics da trend sin ils passapes. Quests vehichels tutgan sin via ed i valan las reglas da traffic ed il cumportament da charrar sco tar ils velos.
• Ils vehichels electrics da trend ch'ins po cumprar sin la fiera èn vehichels d'in plaz. Viadis da duas u dapli persunas a medem temp èn scumandads.
• Ils vehichels electrics da trend ston charrar cun glisch er da cler.
• La chapellina n'è betg obligatorica en mintga cas, vegn dentant adina recumandada.
• Ils vehichels electrics da trend, sco il smartwheel electric (hoverboard), la monoroda electrica (monowheel) ed il skateboard electric, n'èn betg admess per il traffic e na dastgan betg vegnir duvrads sin vias publicas.

Fegl d'infurmaziun "Tge vala per vehichels electrics da trend"

Purschidas per uffants e giuvenils

Dasper referats e scolaziuns per persunas privatas, instituziuns ed interpresas, instruin nus er en scolas dal chantun Grischun davart temas da la polizia da traffic.

Scolina: Emprims pass sin via

Per ch'ils uffants dumognian a moda segira lur emprims pass sin via, mussain nus ad els en l'instrucziun da traffic co ch'els duain sa mover a pe en il conturn da la via. Cun agid da l'instructura u l'instructur da traffic treneschan els tranter auter il cumportament correct sin il passape, a la strivla melna e cun traversar la via.

Uschia è l'instrucziun da traffic concepida en scolina:

puncts centrals:

"spetgar-guardar-tadlar-ir" / Cumportament a la strivla melna, ir sin il passape, traversar la via, visibladad (tschinta da segirezza/vesta da segirezza)

volumen en scolina:

2 lecziuns instrucziun illustrativa en scolina e trenament pratic sin la via publica

Avis per geniturs/persunas cun represchentanza legala

Nossa instrucziun da traffic na remplazza betg la part la pli impurtanta: las enconuschientschas da basa dal traffic che Vus stuais intermediar als uffants. Sche Vus trenais regularmain il cumportament correct sin la via a chasa da la scolina ed en il temp liber promova quai l'independenza da Voss uffant en il traffic sin via.

Dapli dal tema: «uffants sin la via da scola»"

Emprima classa: per via a pe

Sin la via da scola pon uffants far experientschas impurtantas: els fan amicizias, emprendan d'ir enturn cun conflicts e treneschan il cumportament correct sin via. En l'instrucziun da traffic en scola tematisain nus il cumportament correct, e las reglas ed ils signals ils pli impurtants per pedunas e peduns, kickboards e co.

La finamira è ch'ils uffants possian far sulets ed a moda segira la via da scola. Sco preparaziun per las emprimas emprovas cun il velo sin ina via publica visitan las scolaras ed ils scolars per part gia en la 1. classa l'emprima giada l'iert da traffic.

Uschia è l'instrucziun da traffic concepida en l'emprima classa:

puncts centrals:

"spetgar-guardar-tadlar-ir" / cumportament a la strivla melna, traversar la via, identifitgar situaziuns da privel simplas

volumen 1. classa:

2 lecziuns instrucziun illustrativa en stanza da scola e trenament pratic en il conturn da la via

Avis per geniturs/persunas cun represchentanza legala:

Preparai Voss uffant per la via da scola: trenai cun el la via, mussai e declerai ad el situaziuns spezialas. Tematisai era ch'el duai adina prender la medema ruta. Uschia mussais Vus a Voss uffant il cumportament correct sin e dasper via ed el emprenda da far sulet la via da scola a pe e pli tard era cun il velo.

Dapli dal tema: «uffants sin la via da scola»

2. fin 5. classa: da viadi cun il velo – enconuscher las reglas da traffic

Da la 2. fin la 5. classa stat il velo en il center da l'instrucziun da traffic. Pass per pass emprendan ils uffants da sa mover a moda segira sin duas rodas en il traffic sin via.

Ina muntada speziala per las scolaras ed ils scolars ha l'instrucziun pratica d'ir cun velo en l'iert da traffic temporar – ch'ils uffants pon visitar almain ina giada durant lur temp en la scola primara – e sin la via publica.

Dasper las reglas e prescripziuns emprendan ils uffants en spezial d'identifitgar gia baud situaziuns da privel en il conturn da la via, d'adattar lur cumportament tenor la situaziun e dad uschia evitar accidents. Cun controllas d'emprender durant l'instrucziun examinain nus las enconuschientschas da basa teoreticas.

Uschia è l'instrucziun da traffic concepida en la 2. fin 5. classa:

volumen 2. classa:

2 lecziuns teoria en stanza da scola

puncts centrals:

cumportament a la strivla melna / cun traversar la via ("spetgar-guardar-tadlar-ir"), identifitgar situaziuns da privel simplas, reglas e signals per pedunas e peduns, ciclistas e ciclists ed urdains sumegliants a vehichels, equipament e visibladad, numers d'urgenza

volumen 3. classa:

2 lecziuns teoria en stanza da scola

puncts centrals:

signals da via, numers d’urgenza

volumen 4. classa:

2 lecziuns teoria en stanza da scola

puncts centrals:

equipament da velo e da protecziun (chapellina), cumportament correct cun manar giu a dretga u a sanestra / midar vial / en la rundella, numers d'urgenza

volumen 5. classa:

2 lecziuns teoria en stanza da scola; tut tenor basegn ina lecziun pratica supplementara d'ir cun velo sin la via publica

puncts centrals:

dretg da precedenza, situaziuns da privel, «angul mort», ir cun velo sin la via (tut tenor basegn): tempo, furmaziun dal vial, tecnica da guardar, dar segns, tecnica da franar, cumportament correct cun manar giu / midar vial / en la rundella, numers d’urgenza

Avis per geniturs/persunas cun represchentanza legala

Sa mover a moda segira en il traffic sin via è ina chaussa dal trenament. Gidai Voss uffant cun exercitar regularmain dad ir cun velo e cun trenar il cumportament correct en il traffic sin via. Ils pli impurtants documents ed exercizis simpels e pratics chattais Vus qua: l'instrucziun da traffic

L'iert da traffic per scolaras e scolars

Cun l'iert da traffic temporar èn las instructuras ed ils instructurs da traffic da la Polizia chantunala dal Grischun da viadi durant l'onn da scola en il rom da la scolaziun annuala da l'instrucziun da traffic, e quai en ca. 4 fin 6 lieus en differentas regiuns dal chantun. La finamira è che mintga scolara e scolar primar possia visitar almain ina giada durant il temp da scola la scolaziun en l'iert da traffic.

En l'iert da traffic temporar resp. sin ina plazza segira (areal protegì) emprendan e treneschan tut las classas primaras durant in'ura a moda pratica dad ir cun velo. Era las pli impurtantas signalisaziuns ed ils pli impurtants dretgs da precedenza sin via emprendan els qua d'enconuscher.

Video