Servetsch spezial 1

Las investigaturas ed ils investigaturs dal Servetsch spezial 1 elavuran cas da criminalitad fitg greva. Lur champ d'incumbensas pertutga las suandantas proceduras:

• delicts da mazzament
• crims cunter la libertad, p.ex. prender ostagis e far rapiment
• rapina seriala, enguladitsch cun infracziun ed engion
• grevs delicts sexuals
• commerzi cun drogas e commerzi cun umans organisà

Il post spezialisà Tschertga da vehichels tracta delicts dal sectur d'enguladitschs da vehichels sco er d'engions d'assicuranza en connex cun vehichels. Ultra da quai è el responsabel per liquidar il repatriament da vehichels engulads e da vehichels sequestrads en Svizra ed a l'exteriur.

Il Post spezialisà per armas giuditgescha dumondas concernent l'acquisiziun d'armas da fieu ed elavura disposiziuns en chaussa, emetta cartas europeicas d'armas da fieu, prenda encunter armas e muniziun che vegnan consegnadas voluntarmain e cusseglia en dumondas specificas.

Servetsch spezial 3 - Delicts economics

Il Servetsch spezial 3 è responsabel per tut las dumondas penalmain relevantas cun in aspect economic. Sper delicts economics classics sco la defraudaziun e la gestiun malfidaivla e delicts cunter la facultad en furma d'engion u da delicts sumegliants a l'engion, cumpiglia il champ d'activitad interessant dal Servetsch spezial 3 er investigaziuns en connex cun delicts da concurs e da scussiun, sco er en il sectur da la falsificaziun da documents e da la lavada da daners. Las dumondas cumplexas che sa tschentan en connex cun delicts economics pretendan vastas enconuschientschas en differents champs giuridics, sco il dretg d'obligaziuns, il dretg da scussiun e da concurs, il dretg d'assicuranza sociala ed ulteriuras disposiziuns dal dretg penal accessoric che pertutga l'economia resp. las finanzas.

Servetsch spezial 5 - Observaziun

En connex cun il scleriment da delicts sustegnan las collavuraturas ed ils collavuraturs dal servetsch spezial Observaziun ils servetschs da la Polizia chantunala che investigheschan. Tras observar zuppadamain procuran ellas ed els per cumprovas che vegnan integradas en las proceduras penalas. En il center da quest servetsch stat il cumbat da la criminalitad organisada.

Servetsch da cybercriminalitad

Tschertga da fastizs en bits e bytes. En quasi tut las investigaziuns na sa laschan ils fastizs digitals strusch ignorar. Il Servetsch da cybercriminalitad (SCYC) da la Polizia chantunala dal Grischun sa cumpona dals servetschs spezials Forensica digitala, Investigaziun e support en fatgs da cybercriminalitad sco er dal Post d'analisa criminala. Il servetsch interdisciplinar vul cumbatter effizientamain la criminalitad en il spazi virtual ed investighescha en connex cun datas digitalas. Tar il SCYC lavuran tant emploiadas civilas ed emploiads civils sco er polizistas e polizists cun scolaziuns spezialas, tranter auter en il sectur da l'informatica, da data science, da la criminologia, da la criptoanalisa e da la cybersegirezza. Ultra da quai dispona il Servetsch da cybercriminalitad d'ina infrastructura specifica cun hardware e cun software speziala.

Infurmaziuns davart il SCYC sco er davart la cybercriminalitad e ses privels en l'internet: Servetsch da cybercriminalitad