Polycom è la rait naziunala radiofonica per la segirezza da las autoritads e da las organisaziuns da salvament e da segirezza (AOSS). Ella pussibilitescha il contact radiofonic entaifer sco tranter las differentas organisaziuns da la polizia, dals pumpiers, dal servetsch da salvament sanitar, da la protecziun civila, da l'Uffizi federal da duana e da segirezza dals cunfins (UDSC), dal mantegniment da las vias naziunalas, dals gestiunaris d'infrastructuras criticas e da l'armada en acziuns subsidiaras.

Il Center da cumpetenza Func maina l'infrastructura radiofonica Polycom per incumbensa dal chantun Grischun. Repartidas sin l'entir chantun Grischun vegnan tgiradas staziuns sco er cumponentas dal sistem per metter a disposiziun la communicaziun radiofonica. Ils apparats radiofonics colliads da las organisaziuns sco er ils gestiunaris d'infrastructuras criticas pon uschia utilisar la rait da communicaziun segirada. Ultra da las incumbensas tecnicas tgira la C Fc tut ils contracts e tut las documentaziuns che resultan en las staziuns e realisescha projects en il sectur dal mantegniment sco er da la tgira da las cumponentas dal sistem.

Il Center da cumpetenza Func è entaifer la Polizia chantunala dal Grischun il post da contact per tut ils fatgs tecnics radiofonics. Per quest intent metta el a disposiziun ils apparats radiofonics e tut ils accessoris e scolescha las utilisadras ed ils utilisaders per lur applicaziun. Per las centralas d'acziun da la Polizia chantunala dal Grischun e da la sanitad Centrala dal clom d'agid sanitar 144 tgira el la direcziun radiofonica.

Il Center da cumpetenza Func maina in servetsch da pichet per disturbis gravants en la rait radiofonica e presta in ulteriur sustegn tecnic en cas da situaziuns extraordinarias.