Las persunas spezialisadas dal post spezialisà Prevenziun cusseglian la populaziun per reducir la ristga da daventar victimas d'in malfatg. Per la cussegliaziun da protecziun cunter infracziun vegnan ellas al lieu, visitan e documenteschan l'object d'abitar cun fotografias e cun graficas e preparan in rapport cun recumandaziuns. Co passa ina tala cussegliaziun e tge plivalur porta ella a las abitantas ed als abitants?
René Schuhmacher – el sa designescha sez sco «fanaticher da segirezza» – prenda sco emprim l'isch-chasa sut la marella. Sin l'iPad fa el directamain notizias sin la fotografia fatga: En verd per bunas mesiras per franar l'infracziun, qua la serradira da 3 puncts, ed en cotschen per pussaivladads da meglieraziun, p.ex. sto il cilinder da la serradira esser a medem nivel cun l'isch u cuntegnair ina rosetta.
Sin la glista da las recumandaziuns na vegnan dentant betg mo mesiras tecnicas. Cumbain che nagin chaun n'abita pli qua – pertge betg tuttina montar ina tavletta a la porta da l'iert: «Attenziun dal chaun». La summa da tut las mesiras signifitga a la fin ina protecziun integrala. Uschia lauda Schuhmacher la possessura da la chasa, cura ch'el remartga ina lampa cun programmader casual.
Fanestras cun giatters al plaunterren vesa l'expert gugent. Las struvas pudess ins anc segirar cunter demontascha, per ch'ellas na possian er betg vegnir distatgadas cun in utensil. Enturn la chasa n'èn er depositads nagins agids da raiver sco stgalas, medemamain nagin utensil che pudess vegnir duvrà per ina infracziun. A propos utensil: Infracturas ed infracturs na van betg adina cun in palfier surdimensiunà tras la cuntrada, mabain portan cun els tut discret in tirastruvas. Ultra da quai n'èn ellas ed els betg propi pronts da surpigliar ristgas. Uschia han ellas ed els tema da sfratgar ina fanestra. Quai chaschuna canera ed igl exista il privel da feridas.
Igl expert emprova d'ina vart da sensibilisar, da l'autra vart da calmar. L'onn 2021 han ins dumbrà 22 700 infracziuns en Svizra e 359 infracziuns en il Grischun, l'onn 2022 eran quai 25 452 en Svizra e 553 en il Grischun.
«Qua fiss mes lieu d'access preferì, sche jau fiss ina infractura u in infractur», di Schuhmacher. Davent da la via e protegì tras ils bostgs pudess in infractur entrar qua senza disturbis tras la fanestra. Uschia signifitgan bostgs enturn l'immobiglia avantatgs e dischavantatgs, paravista per las abitantas ed ils abitants da l'immobiglia, ma er per l'infractur. 
Questa falla da la fanestra n'è betg segirada. Schuhmacher menziunescha ina falla da la fanestra per serrar cun la clav u cun serradiras a chau da bulieu sco mesiras da protecziun pussaivlas.
Il rapport da segirezza cumplet survegnan las abitantas ed ils abitants da la chasa suenter l'inspecziun per e-mail, natiralmain cun in pled-clav che vegn fixà oz. Ultra da las mesiras tecnicas ch'èn priorisadas sin in'axa cronologica per vegnir realisadas en etappas, accentuescha l'expert a la fin l'impurtanza da la rutina positiva: «Serrai cun la clav l'isch-chasa, sche Vus lavurais en l'iert e na laschai betg las fanestras cupitgadas, sche Vus giais a far cumpras!»