Questa stad sa deditgescha il Museum Laax dal tuttafatg als chalzers. La curatura Romana Brunold ha collectà chalzers e lur istorgias captivantas. Uschia han er in pèr chalzers da polizia e las aventuras da ses possessur chattà la via en l'exposiziun. Davos ils chalzers da polizia sa zuppa ina tragedia.
Il possessur dals chalzers da polizia ha cumenzà da buna luna ses servetsch la sonda, ils 4 d'avust 2018. Curt suenter è el vegnì clamà a Flem – l'incumbensa sa clamava: Survegliar durant la notg – ensemen cun in collega da polizia – il lieu da disgrazia d'ina crudada d'in aviun sin 2540 m sur mar, nua che tut ils 20 passagiers han pers la vita.
Durant il sgol cun il helicopter si tar il lieu da l'accident al Piz Segnas gievan nauschs maletgs tras ses chau. Cun il sustegn da commembers dal CAS èsi vegnì endrizzà in deposit da material ed in quartier da notg. A chaschun d'in gir al lieu da l'accident è sa mussada la dimensiun da la crudada – definitivamain betg in bel maletg.
«Alura eran nus sulets. Nus, las victimas ed il silenzi. Ma insatge era en l'aria: L'odur dal cherosin ch'era culà ora, l'odur metallica da sang. Ed adina puspè quest silenzi.»
La curatura Romana Brunold sa legra, ch'ella ha er obtegnì ils chalzers da Martin Candinas per sia exposiziun. Quai èn ils chalzers ch'el ha gì en ils 28 da november 2022, il di ch'el è vegnì elegì sco president dal Cussegl naziunal. «Quests chalzers m'han accumpagnà durant il mument il pli emoziunal da mia via politica.» Dasperas dattan en egl chalzers dad aur da ballet e chalzers cun plateaus e tatgs auts: Els tutgan a la magistra da ballet Jamie Kanik da la California, che instruescha a Schluein.
Questa paraid è decorada cun fotografias da tut las persunalitads che preschentan lur chalzers cun lur istorgias. Davant a dretga ils chalzers da skis da Carlo Janka, il victur da la cuppa mundiala da skis alpin. «Quests chalzers da skis, che jau hai gì en tar mia cursa finala 2022 al Lauberhorn, èn in simbol per tut ils auters chalzers da skis che han furmà durant tut quels onns mes pes, sco quai ch'els èn oz.»
En l'exposiziun permanenta mussa il Museum Laax er l'istorgia ed ils usits da Laax. Il museum ha plinavant in café e porscha bleras occurrenzas.