La Polizia chantunala dal Grischun e la Polizia da la citad da Cuira han lantschà cuminaivlamain la campagna da stad «Has serrà». Ad occurrenzas da prevenziun han ellas sensibilisà la populaziun da proteger lur objects da valur en chasas, abitaziuns u autos sco er da serrar giu il dachasa ed ils vehichels.
In engraziament per las coolas tastgas da sport ed in splatsch cun il maun sco cumià – quai fa plaschair, uschia funcziuna confidenza cun la polizia. Entant che questas duas mattas han plaschair da l'inscunter, nizzegia ina visitadra dal stan ch'è preoccupada l'occasiun da far ina dumonda seriusa: «Dastg jau telefonar al numer d'urgenza 117, sch'i vegn randalà tar nus en il quartier d'abitar?»
«Vus dastgais adina cumponer il 117, sche Vus avais ina dumonda urgenta a la polizia», respunda quest polizist, ed el agiunscha: «Sch'i vegn scalinà en in bloc d'abitaziuns, betg simplamain avrir la porta da l'entrada principala – uschia pon persunas nunenconuschentas numnadamain entrar en ina chasa ch'è atgnamain serrada.»
Duas persunas pensiunadas remartgan: «Nus avain affittà in'abitaziun e l'isch-chasa è per il solit avert. Quai n'interessa insumma betg il locatur!» «Scrivai a l'administraziun per la far attent a questa situaziun», vegni cusseglià ad ellas. «Quella po u scriver a las locatarias ed ils locataris u anc ina giada far attent a l'urden da chasa.»
L'avantmezdi sa barattan las spezialistas ed ils spezialists da prevenziun d'omadus corps sin l'Alexanderplatz en il center da la citad cun la populaziun. Ed il suentermezdi transfereschan els lur stan entamez il bogn avert Obere Au. «Grazia per la lavur da polizia, jau sun cuntent, ch'i dat anc glieud che fa questa lavur», di in giast che fa bogn durant ch'el flanescha al bogn avert.