La construcziun dal nov Center da la polizia stradala nord è terminada e l'edifizi cun 562 moduls fotovoltaics è pront. Las forzas da polizia dals centers da Tusaun e da Cuira èn vegnidas reunidas ed han midà chasa.
Surdada da la clav tras l'architect chantunal Andreas Kohne al cumandant Walter Schlegel.
Dapi che las lavurs da construcziun per il nov edifizi dal center da la polizia stradala han cumenzà èn ussa passads bundant 18 mais. Oriundamain era la midada da chasa planisada per l'atun 2024. Ma gia la mesemna, ils 14 d'avust 2024, èn las clavs vegnidas surdadas a la Polizia chantunala dal Grischun. Las collavuraturas ed ils collavuraturs da Tusaun e da Cuira han pachetà lur materials e s'installeschan ussa en lur novas localitads.
Paraids d'arschiglia: Maschadada cun cement è questa metoda da construcziun nova. Ella n'existiva anc betg uschia.
Ils plazs da lavur èn organisads en moda polivalenta. Quai vul dir, ch'i n'èn betg attribuids plazs da lavur fixs e ch'i vegn lavurà en plazs mobils. Tut en tut existan 45 da quels «caddies» en il nov center da la polizia stradala. Per tuttina pudair manar discurs senza disturbis, datti divers locals da sesida ch'èn tuts denominads tenor las muntognas da la regiun. En dus da quels locals è plazzada mintgamai ina maisa construida ord il lain dal nuscher ch'era avant la construcziun sin quest terren.
Locals variabels: Saja quai per sesidas, per consultaziuns u per lavurs en gruppas; ils locals pon vegnir utilisads per differents intents.