La fin d'october han la Polizia chantunala dal Grischun, la Polizia di stato (Polizia stradale) e l'Administraziun federala da duana fatg per l'emprima giada communablamain controllas da traffic transcunfinalas, quai en la provinza da Sondrio ed en l'Engiadin'Ota. La basa per quai furma il contract internaziunal (cunvegna) tranter il Cussegl federal svizzer e la Regenza da la Republica taliana davart la cooperaziun tranter las autoritads da polizia e da duana.

 

Sin basa dal contract internaziunal da l'onn 2016 han la Polizia chantunala dal Grischun e la Polizia di stato fixà ina intesa (decleraziun d'intenziun) ed in vademecum (disposiziuns executivas). Cun las cunvegnas suttascrittas il favrer intesa e vademecum è vegnida sviluppada vinavant la collavuraziun transcunfinala en il sectur da la Polizia da traffic. La Polizia chantunala dal Grischun e la Polizia di stato fan uschia in ulteriur pass en lur cooperaziun. Dapi la fin d'october fan ellas er communablamain controllas polizialas da traffic. Il cumenzament da l'emprima patruglia maschadada ha gì lieu a Mese (Val Clavenna / Italia) cun in act festiv. En acziun è stada er ina patruglia da l'Administraziun federala da duana.

En il Grischun circuleschan las patruglias maschadadas sin las rutas dal Puschlav, da la Bregaglia, da l'Engiadin'Ota, sin il Pass da l'Umbrail fin en la Val Müstair e sin il Pass dal Spleia. Sur il Pass dal Spleia sco er sur il Pass dal Güglia vegnan cuntanschids ils lieus Cazas e San Vittore, per che las patruglias maschadadas possian esser activas en ils centers da controlla per il traffic pesant.

Preschent per lung da l'entir cunfin a l'Austria ed a l'Italia

Cun las activads transcunfinalas las pli novas ademplescha la Polizia chantunala dal Grischun la collavuraziun cun sias organisaziuns partenarias per lung da l'entir cunfin a l'exteriur (Austria ed Italia). Dapi passa 10 onns realisescha ella gia communablamain cun las autoritads austriacas controllas en il territori dal cunfin a l'Austria. En il center stat er la cooperaziun cun ils carabinieri da la provinza da Bulsaun e cun ils carabinieri da la provinza da Sondrio (en emprima lingia en il sectur da la polizia criminala).