La fin da settember ha gì lieu la tschientavla patruglia maschadada en la regiun da Bregaglia – Clavenna (I). En quest connex è stada dumandada ina tscherta flexibilitad.

«Sper nossa lavur quotidiana da polizia procurain nus – er cun questas sorts controllas – che noss chantun saja segir per la populaziun e per ils giasts», uschia il cumandant da la Polizia chantunala dal Grischun, colonel Walter Schlegel. Suttastritgada vegn sia explicaziun dal litinent Andrea Mittner, schef da la regiun Engiadina: "La finamira è quella da trair a niz sinergias cun nossas organisaziuns partenarias svizras e da l'exteriur e d'utilisar talas en moda effizienta ed efficazia en spazis da segirezza definids". La collavuraziun transcunfinala ch'ins ha inizià il cumenzament dals onns 2010 cun la Polizia da l'Austria han ins extendì l'onn 2020 sin ils Carabinieri, sin la Polizia di Stato sco er sin l'Uffizi federal da la duana e da la segirezza dals cunfins (UDSC).

Flexibilitad vivida
Per la fin da settember era planisada la tschientavla patruglia en la regiun da Bregaglia – Clavenna (I). Pervia da la tschertga d'ina persuna sparida han ins dischlocà la patruglia senza far lungas en il Puschlav. En acziun eran la Polizia chantunala dal Grischun ed ils Carabinieri. Pervia d'in auter motiv han ins extendì l'acziun sin in accident da traffic. Marcel Solèr, il manader d'acziun da questa patruglia, exprima quai uschia: "Nus agin tenor la situaziun. La tschientavla patruglia è bain l'exempel tipic, che nus vivain la flexibilitad necessaria e che nus agin cuminaivlamain a favur da la segirezza."