Suenter l'attentat sin la delegaziun istraeliana als Gieus olimpics 1972 a Minca han las polizias fundà en l'entira Europa unitads antiterroristicas. Er la Polizia chantunala dal Grischun. L'Unitad d'intervenziun ha pudì festivar quest onn ses giubileum da 50 onns.
L'act terroristic a Minca ha cumenzà la damaun marvegl cun l'attatga sin il quartier d'abitar israelian en il vitg olimpic. En quest act èn dus sportists vegnids mazzads e nov ulteriurs prendids sco ostagis. Suenter tractativas senza resultat è l'act ì a fin durant la notg dals 6 da settember 1972 sin la plazza aviatica Fürstenfeldbruck cun in'emprova da liberaziun che n'ha betg gì success. Tut ils nov ostagis israelians, in polizist sco er tschintg dals otg rapinaders èn vegnids mazzads. (Funtauna: Vichipedia)
En il context da la situaziun da quella giada ha la Polizia chantunala dal Grischun recrutà l'onn 1973 intgins collavuraturs dal Servetsch d'urden ed ha scolà quels a grenadiers. L'onn 1977 è vegnida fundada l'Unitad antiterroristica che ha survegnì pli tard il num sonor «Kristall». Ils commembers èn vegnids recrutads per gronda part dals grenadiers, cumbain che tuts n'ademplivan betg las cundiziuns d'admissiun (fitness, cundiziun, trair, in pau savida teoretica, cumprovas da curaschi).
L'unitad ha tegnì pitg a las pretensiuns dals temps respectivs grazia ad ina scolaziun e furmaziun supplementara correspundenta, grazia a la tecnica e grazia a l'experientscha en l'acziun. Ella entra en acziun cunzunt per proteger persunas periclitadas cunter la criminalitad greva u per dumagnar situaziuns che pericliteschan la vita.
Sonda, ils 11 da november 2023, ha gì lieu ina festa da giubileum. Giasts da la politica, d'organisaziuns partenarias sco er anteriurs intervenziunists (numnads pli baud grenadiers) èn vegnids envidads. L'emprim schef da l'unitad, Andreas Donatsch, ha preschentà la cronica cun raquints dal temp da fundaziun. El ha procurà per fatschas rientas declerond ina da las cumprovas da curaschi da quella giada «Siglir en in batschigl senza savair nudar» sco er per fatschas pensivas faschond endament in cas dals onns 1980 «In um che tira arbitrariamain e che terrorisescha la regiun en la Val Calanca».
L'emprim schef da l'unitad d'intervenziun surdat ina perditga dals onns da fundaziun a ses successur actual.
Tant il cumandant da la Polizia chantunala dal Grischun sco er il schef da la Polizia da segirezza ed il schef actual da l'Unitad d'intervenziun han dilucidà aspects da la naschientscha, dal temp preschent e da l'avegnir da l'unitad.
Per la part uffiziala da la festa eran envidads giasts da la politica, da l'armada sco er represchentants da differents corps da polizia ed anteriurs commembers da l'Unitad d'intervenziun.
Suenter la part uffiziala cun preschentaziuns da la tecnica e da las acziuns era l'occurrenza reservada per las forzas d'acziun e per lur famiglias. La chapientscha dals commembers da famiglia per questa part da la lavur da polizia ha survegnì in engraziament spezial. Perquai che ina chaussa resta adina la medema dal cumenzament da l'unitad ennà fin oz ed er en l'avegnir: ina voluntad absoluta a l'acziun a favur da la populaziun e dals giasts na pretenda betg mo l'engaschi da las forzas d'acziun, mabain er la chapientscha da lur famiglias!