Mesemna, ils 6 da mars e gievgia, ils 7 da mars 2024 ha la Polizia chantunala dal Grischun realisà a Tavau il 35avel Campiunadi da skis svizzer da la polizia (SPSM 2024). In comité d'organisaziun da dudesch persunas sut la direcziun da Marcel Leuthold-Züger è vegnì incumbensà dal cumandant colonel Walter Schlegel d'organisar e da realisar las concurrenzas. Ensemen cun il cusseglier guvernativ Peter Peyer ha Walter Schlegel partì il presidi d'onur. Il presidi d'onur da l'occurrenza han il cusseglier guvernativ Peter Peyer e Walter Schlegel partì.
Durant dus dis èn sa mesirads var 170 polizistas e polizists da differents chantuns da la Svizra sco er dal Principadi da Liechtenstein en las disciplinas slalom gigant, passlung e cursa da patruglia.
L'emprim di han 21 dunnas e 91 umens mussà ina concurrenza individuala da passlung fitg cumbattida sin il traject «Chaiseren», ch'è gia sa cumprovà a chaschun da la cuppa mundiala.
24 participantas ed 89 participants han absolvì gievgia avantmezdi ina cursa da slalom gigant sin la pista da la FIS «Usser Isch» sin il Jakobshorn.
Ils dus dis da concurrenza èn vegnids terminads cun in passlung da patruglia gievgia suentermezdi. 9 teams da dunnas e 28 teams d'umens han cumbatti per la victoria.
A chaschun d'ina degna proclamaziun dals rangs la saira èn Monika Walker da la Polizia chantunala da l'Uri e Martin Rosser da la Polizia da la citad da Turitg vegnids numnads campiunessa e campiun svizzer da skis da la polizia. Il titel da campiun svizzer da passlung da patruglias skis da la polizia ha il team da dunnas da la Polizia chantunala da l'Argovia gudagnà cun las duas curridras Alina Herger e Nicole Schatzmann ed il team dad umens da la Polizia da la citad da Turitg cun ils curriders Martin Rosser, Michael Suter e Michael Bruhin.
Il team da skis da la polizia grischuna ha gudagnà cun sia buna prestaziun en las singulas categorias tut en tut 13 medaglias – quatter distincziuns d'aur, duas d'argient e set da bronz.
