En l'instrucziun «medias digitalas» a la Scola media evangelica Schiers ha il post spezialisà Prevenziun intermedià avant pauc temp dapli che mo teoria. En gruppas han las scolaras ed ils scolars giuditgà cas reals ch'èn capitads en il Grischun e dals quals la Procura per giuvenils è s'occupada. Tranter auter han ils giuvenils emprendì, pertge ch'in nickname per gieus online po esser in problem.
Suenter ina curta runda d'emprender d'enconuscher ha Marcel Trinkler cumenzà l'instrucziun e fatg dumondas concretas als giuvenils da 13 onns: A partir da tge vegliadetgna vala il dretg penal per giuvenils? Per la resposta correcta, numnadamain a partir da 10 onns, ha el regalà in biscuit da fortuna cun ina maxima. Ils giuvenils han emprendì d'enconuscher la differenza tranter il delict persequità sin plant ed il delict persequità d'uffizi.
Alura ha Marcel Trinkler explitgà delicts en connex cun medias digitalas, en spezial cun pornografia, cun represchentaziun da violenza e cun cyber-grooming. Co pon ins sa proteger da betg daventar ina victima e cura èn ins sezza u sez delinquenta u delinquent? «Gist cun dar gieus en l'internet stuais vus far attenziun», ha declerà Marcel Trinkler. «Emplenì mo ils champs obligatorics da Voss account! Gia in nickname po tradir insatge da vus.» 
Cyber-grooming designescha il pledentar persunas en l'internet cun la finamira da cumenzar contacts sexuals. «Betg tuts che vulan scuntrar vus, n'èn delinquents», ha relativà Marcel Trinkler. «Però na scuntrai mai sulets persunas che vus enconuschais da l'internet – ed adina mo durant il di en in lieu, nua che blera glieud sa trategna.»
En gruppas han ils giuvenils elavurà cas reals e surpiglià la rolla da la Procura per giuvenils. È cunvegnenta ina reprimanda, ina multa, ina prestaziun da lavur persunala, ina detenziun u ina cumbinaziun da chastis e da mesiras?
Tge signifitga «RAT»?
A la fin da l'instrucziun han ils giuvenils stuì chattar or, tge che Marcel Trinkler als cusseglia per lur contacs e relaziuns en il mintgadi. «Tge signifitga RAT – la noziun englaisa per ratun?» Respect, maniera (Anstand), toleranza – ha la classa chattà or e tuts han obtegnì in biscuit da fortuna cun ina maxima. En ina da questas pastizarias ha ina scolara chattà la suandanta maxima: «In pled vegn a construir ina punt» – quai va a prà cun il ratun englais «RAT».