In punct culminant spezial è stà per ils uffants, cura che las sirenas cun in ferm tun da l'auto da polizia èn entradas en funcziun. Cun grondas mirveglias han els seguì, co ch'ils polizists han preschentà ils vehichels ed han raquintà chaussas interessantas surlonder. Tgi che ha gì il curaschi, ha schizunt survegnì la pussaivladad da muntar sin la moto da polizia.

En la segunda etappa han ils uffants survegnì ina curta invista da la centrala d'acziuns. Ussa san els, nua exact ch'ils numers d'urgenza 117 da la polizia e 144 dal clom d'agid sanitar vegnan respundids.

Suenter ina curta pausa ha il program per la gruppa cuntinuà. Quella giada è stada ina preschentaziun tut speziala sin il program: in chaun detectur da drogas. Il polizist ha mussà als uffants la diversitad da las substanzas privlusas. Els èn vegnids a savair quant impurtanta che la lavur da quests chauns è. Ils chauns vegnan da chagniels davent trenads per chattar narcotics cun agid da lur odur. 

La gruppa ha spetgà cun tensiun da pudair vesair il chaun en acziun. Cun grondas mirveglias ha ella guardà, co ch'il chaun ha percurrì tut il conturn cun ses nas fin impressiunant ed ha mussà cun success quai ch'el ha chattà.