Term impurtant en la gestiun d'infurmaziuns
In term impurtant per la preschentaziun e per l'access al maletg da la situaziun da la Polizia chantunala dal Grischun è vegnì cuntanschì il december 2021. Tut las infurmaziuns relevantas èn deponidas e pon vegnir consultadas dapi lura en in lieu central. Avant stuevan ins tschertgar questas infurmaziuns en differents lieus.
Infurmaziuns per l'acziun en temp real
"Cun il nov maletg da la situaziun vegn augmentada la segirezza da la populaziun e da las forzas d'acziun", di Hansjürg Lingenhag dal Center da situaziun e da direcziun da la Polizia chantunala dal Grischun. Sche las patruglias da la polizia èn sin via ad in'acziun, pon ellas consultar tut las infurmaziuns relevantas en gir. La premissa per quai è in notebook cun carta SIM. Tar la Polizia chantunala dal Grischun disponan tut las collavuraturas ed ils collavuraturs d'in notebook ed han uschia adina cun sai lur plazza da lavur mobila.
Dossiers d'edifizis publics, avertiments da malauras ed eveniments da l'ambient, serias marcantas da delicts, in'agenda cun occurrenzas, cumonds d'acziun, persunas sparidas u tschertgadas, process da situaziuns preparadas, exercizis d'unitads spezialas e bler dapli cumpara sco simpel icon sin la charta geografica dal chantun Grischun. Cun in clic cun la mieur pon las polizistas ed ils polizists consultar ils detagls. Ellas ed els chattan tut quai ch'è impurtant per lur lavur, er infurmaziuns delicatas. "Questas infurmaziuns èn impurtantas, per che tuttas e tuts vegnian puspè sauns a chasa", uschia Hansjürg Lingenhag.
Colliaziun da biros da situaziun
Il SSI è adina actual e guarda vers il futur, tut tenor Einstein: "Jau ha l'intenziun da viver en il futur", di Hansjürg Lingenhag. Per che quai saja pussaivel, preparan spezialistas e spezialists dal sustegn da la direcziun tut quai ch'è impurtant per la lavur da la polizia e mettan a disposiziun quai sco open source. Actualmain lavuran pir intgins corps da polizia cun il SSI, ulteriurs èn dentant interessads. Il SSI vegn sviluppà vinavant cuntinuadamain, ed en l'avegnir vegnan ils biros da situaziun dals singuls corps da polizia ad esser colliads ed a pudair barattar infurmaziuns.