IL'onn 2014 ha la Polizia chantunala dal Grischun elavurà la strategia da computers mobils. Quella descriva tranter auter la finamira per duvrar apparats da lavur mobils sco notebooks, tablets e smartphones. Spezialmain il diever polivalent da smartphones per activitads polizialas è vegnì definì en moda strategica. Dapi la primavaira 2016 stat l'infrastructura tecnica a disposiziun a la Polizia chantunala per applitgar la strategia da computers mobils en moda persistenta ed effizienta e cun in'auta qualitad. Quai premetta che la hardware vegnia adattada periodicamain al stadi da la tecnica il pli actual. L'onn 2022 han las collavuraturas ed ils collavuraturs midà dal iPhone 8 al iPhone 12.

Infrastructura voluminusa dad IT davos las culissas

Cun realisar la strategia è vegnì installà ed amplifitgà in grond sistem digital che pussibilitescha da consultar infurmaziuns polizialas cun differents apparats electronics, sco il smartphone. A las collavuraturas ed als collavuraturs basta ina rait GSM en la qualitad da 3G, per ch'ellas ed els possian cumenzar ad elavurar in cas independentamain dal lieu u per ch'ellas ed els possian s'acquistar infurmaziuns impurtantas per l'activitad poliziala.

Sin ils telefonins èn installads dus plauns da lavur independents. Il plaun polizial vegn separà cumplettamain dal plaun privat. Il plaun polizial garantescha ina transmissiun segira d'infurmaziuns tras VPN (virtual private network). Fotografias dals lieus dals delicts u dals eveniments sco er material fotografic per segirar las cumprovas vegnan transferids cun l'apparat directamain en il sistem da rapportaziun e da documentaziun. Per la lavur quotidiana da la polizia pon infurmaziuns impurtantas (numers d'immatriculaziun / retschertgas u persunas sparidas / scans da la detta per identifitgar persunas nunenconuschentas / permiss da manischar / objects engulads) vegnir consultadas facilmain e svelt en moda mobila. Latiers tutga er l'access a l'intranet ed al schurnal da las activitads.

Alarm svelt da las forzas d'acziun

Ina cuntanschibladad svelta sco er l'infurmaziun da las forzas d'acziun en cas d'in eveniment èn puncts centrals. Sur ina nova interfatscha dal sistem da direcziun d'acziuns èn tut las collavuraturas ed ils collavuraturs cuntanschibels immediatamain sur l'app d'alarm eAlarm. La centrala d'acziuns survegn uschia ina survista dal dumber da forzas d'acziun che stattan a disposiziun. Durant las acziuns a la front pussibilitescha in livestreaming da maletgs da trametter a la direcziun da l'acziun, en ina localitad interna, ina survista da la situaziun. Er en il chantun topograficamain il pli pretensius e pli grond da la Svizra daventan uschia las distanzas tuttenina bler pli pitschnas.

La Polizia chantunala dal Grischun sa chatta amez la transfurmaziun digitala ed è pia ina part da la midada digitala en la cuntrada svizra da polizia.