Dapi l'onn 2019 dovra la Polizia chantunala dal Grischun dronas per differentas acziuns. La Gruppa da dronas entra particularmain en acziun per la tschertga ed il salvament, per il scleriment e l'exploraziun, per far in maletg da la situaziun sco er per segirar las cumprovas e documentar eveniments da la Polizia da traffic e da la Polizia criminala. Las experientschas dals ultims 5 onns mussan, ch'il basegn d'utilisar dronas tar accidents da traffic crescha. Per tegnair quint da quai, ha il commando da la polizia decidì da cumprar dronas per la Polizia da regiuns. Las dronas da la categoria A1/A3, sut 900g, stattan a disposiziun en totalmain 12 lieus dal chantun Grischun.
Premissas per utilisar dronas
Las dronas vegnan duvradas principalmain per registrar accidents da traffic. Cun la software Zephyr vegnan fatgas registraziuns digitalas realas da las situaziuns d'accident. "Il diever da dronas tras las collavuraturas ed ils collavuraturs a la front na duai e na dastga betg substituir las incumbensas effectivas da la Gruppa da dronas tar acziuns da tschertga e da salvament sco er a chaschun d'eveniments gronds", uschia Cuno G. Berther, coordinatur da las dronas tar la Polizia da regiuns.
Durant var 3 mais survegnan tut las collavuraturas ed ils collavuraturs da la Polizia da regiuns ina instrucziun davart las disposiziuns legalas, da sgol e da segirezza per il diever da dronas. In dals instructurs è Marc Feltscher. "Tut quai che surpassa la lavur da la Polizia da traffic, resta resalvà a la Gruppa da dronas." Cun questa decisiun da princip dal commando da la polizia ha Marc Feltscher cumenzà l'avantmezdi dals 30 d'avrigl 2024 in dals curs d'instrucziun decentrals. Ina polizista e 10 polizists han absolvì quest di en il Center d'instrucziun Meiersboden a Cuira il bloc da teoria stravagant, che Marc ha intermedià en moda suverana e cumpetenta.
"Per la polizia na datti betg permissiuns spezialas u excepziuns per utilisar dronas. Nus stuain observar las medemas disposiziuns sco tut ils auters", cuntinuescha l'instructur. Las participantas ed ils participants han stuì far ordavant in examen online per obtegnair il certificat A1/A3 che vegn pretendì da l'Uffizi federal d'aviatica civila UFAC.
Suenter gentar è vegnì cuntinuà cun la pratica. Cun bler schlantsch han las participantas ed ils participants applitgà suenter gentar las infurmaziuns teoreticas ch'els avevan obtegnì durant l'avantmezdi. "Vus vegnis a vesair, ch'il sgular dovra in tschert inschign e blera energia", uschia l'instructur gist al cumenzament dal bloc pratic.
Cun exercizis simpels han las participantas ed ils participants emprendì quest suentermezdi da sgular cun precisiun dal punct sco er da fotografar e da filmar differents objects per terra. Per quest intent han els stuì calcular exactamain e resguardar il vent sco er eventuals obstachels, sco edifizis, roms e bostgs.
E pelvaira! Ils exercizis da sgol han pretendì blera energia e concentraziun da tut las pilotas e pilots da dronas futurs. L'ina u l'auter n'ha betg suà mo pervia dal sulegl. "Quai fa simplamain plaschair da lavurar cun quest nov med d'intervenziun", uschia in participant dal curs a la fin dal di.