Dapi l'onn 2008 vegnan manads tras curs d'ir cun moto en il Center per la segirezza stradala DrivingGraubünden a Cazas, quai en collavuraziun cun la Polizia chantunala dal Grischun. L'onn 2024 è stà il 100avel curs.

Ils curs vegnan purschids en dus stgalims, numnadamain il curs da basa cun 12 participantas e participants u il curs cumbinà cun 8 participantas e participants. Ils curs vegnan manads d'in instructur da moto dal Center per la segirezza stradala. Sustegn survegn quel d'in polizist cun moto. Tge è pli evident per amaturas ed amaturs da motos, che da survegnir tips d'emprim maun per lur atgna segirezza? Il polizist cun moto da la Polizia chantunala dal Grischun tematisescha situaziuns d'accident ed integrescha quellas en il curs. Da l'instructur obtegnan las motociclistas ed ils motociclists er tips e trics per duvrar correctamain ils assistents electronics da lur motos. L'instructur s'occupa individualmain da mintga moto.

Instrucziun cuminaivla

A favur dal program interessant ed instructiv pleda il fatg, che las motociclistas ed ils motociclists n'han strusch temas u retegnientschas d'ina tala prevenziun d'accidents poliziala e ch'ellas ed els s'annunzian frequentamain. Ina gronda part dals sis curs è stada occupada cumplettamain gia mais ordavant. Il focus da l'instrucziun vegn mess sin la segirezza, la quala po vegnir augmentada cun applitgar la dretga tecnica d'observaziun, cun adattar la sveltezza e cun tscherner la lingia correcta, tut quai èn elements essenzials da la prevenziun d'accidents.