Il 1. da schaner 2017 entra en vigur la revisiun dal dretg davart il mantegniment dals uffants. En l'avegnir vegn la tgira d'uffants tras il genitur che tgira resguardada tar la calculaziun da la contribuziun da mantegniment per l'uffant. Per proceduras ch'èn pendentas il mument che la revisiun entra en vigur il 1. da schaner 2017 vegn applitgà il dretg nov. Ils contracts da mantegniment ch'èn vegnids concludids avant questa data pon vegnir adattads sin dumonda da l'uffant.

Mandat preventiv

Tgi che na po betg pli guardar da sasez e daventa inabel da giuditgar pervia d'in accident, pervia d'ina greva malsogna andetga u pervia da deblezza da vegliadetgna, dovra agid da terzas persunas. Cun agid d'in mandat preventiv po mintga persuna privata abla da giuditgar garantir ch'ina persuna u in post spezialisà, ch'ella sezza ha determinà, vegn autorisà da liquidar las fatschentas necessarias e po far quai en ses senn, en il cas ch'ella daventa inabla da giuditgar. Il fatg ch'in mandant preventiv è avant maun ed il lieu, nua ch'el è deposità pon vegnir registrads tar l'uffizi da stadi civil.

Infurmaziuns pli detagliadas survegnis Vus d'advocatas ed advocats, da notaras e notars u da servetschs da sustegn voluntars (Pro infirmis, Pro senectute e.u.v.).